Ekibastuzdyń eks-ákimin óltirgen qylmysker merziminen buryn bosatylmaıtyn boldy
PAVLODAR. «QazAqparat» - Pavlodardyń №2 soty Ekibastuz qalasynyń burynǵy basshysyn óltirip 9 jyl jazasyn ótegen Serik Muqantaevtyń ýaqytynan buryn shartty túrde bosatý týraly ótinishin keri qaıtardy, dep habarlaıdy «QazAqparat».
Sot Ekibastuz qalasynyń burynǵy basshysy Ramazan Jumataevty óltirgen adamdy merziminen buryn bosatý týraly ótinishti qabyldamady. Muqantaevtyń keshirim týraly ótinishi qatań rejimdegi túzetý mekemesinde qaralǵan. Ol 2008 jyly 51 jastaǵy ákimdi avtomatpen kóshede atyp ketken adamdardyń qatarynda bolǵan. Polıtseıler oqıǵa ornynan sol kezde 7 gılza tapqan.
Qylmyskerlerdiń tórteýi keıin ustalǵan bolatyn. Birneshe jylǵa sozylǵan sot protsesterinen keıin eldi dúrliktirgen is boıynsha 2 adam sottalǵan. Bul is tapsyryspen jasalǵan adam ólimi retinde qaraldy. Jazasynyń úshten ekisin ótegen Muqantaev sottan ózin bostandyqqa shyǵarýdy suraǵan. Zardap shekken tarap buǵan qarsylyq bildirdi.
«Jumataevtar otbasynyń ómiri endi eshqashan ornyna kelmeıdi. Osyndaı jaýyzdyq árekettiń kesirinen olardyń eń aıaýly adamdary, úıdiń otaǵasy, balalardyń ákesi qaza boldy. Sot 13 jyl bergen eken, qylmysker 13 jyl otyrýy kerek»,-dedi advokat.
13 jylynyń 9 jylyn temir tordyń arǵy jaǵynda ótkizgen kıller osy ýaqyttyń ishinde birneshe marapatqa ıe bolypty. Onyń ýaqytynan buryn shartty túrde bosatylýyna túrme ókilderi men memlekettik aıyptalýshy qoldaý bildirdi.
