Ekibastuzdyqtar Ulttyq ekonomıka mınıstrine bıznes josparlaryn tanystyrdy
Mınıstrmen kezdesýde jergilikti mektep oqýshylary, stýdentter, kásipkerler qýyrylǵan balmuzdaq, ekoagrorobot jáne ózge de bıznes josparlaryn, startap jobalaryn tanystyrdy.
Daryndy balalarǵa arnalǵan «Zerde» mektebiniń 10-synyp oqýshysy Temirlan Baıǵojın ámbebap ekoagrorobotty jasap shyǵarǵan.
«Robot astyqty jınaýǵa, sebýge jáne keptirýge arnalǵan. Meniń ıdeıam - tolyq agroóndiristik keshen. Ol ekologııalyq taza baǵytta, «Stırlıng» qozǵaltqyshynyń kúshimen jumys jasaıdy. Іshki jáne syrtqy aýany turaqtandyryp otyrýǵa múmkindigi bar», - dedi Temirlan Baıǵojın.
Oqýshy robotty «Lego» qurastyrǵyshynyń kómegimen jasap shyǵarǵan. Joba aýyldyq eldi mekenniń turǵyndary men fermerlerge jumystaryn jeńildetýge arnalǵan. Keshen jumys kúshi men qarjyny únemdeýge múmkindik bermek.
Tımýr Súleımenov oblys ákiminiń birinshi orynbasary Ulan Jazylbekke oqýshyǵa grant berýdiń jolyn qarastyrýdy usyndy.
Kórme barysynda Ulttyq ekonomıka mınıstri, sondaı-aq qazirgi kezde «Shyǵys» ken ornynda paıdalanylyp jatqan «ıdeıa fabrıkasymen» tanysty. «Fabrıka» jobasy jumysshylardyń usynysymen tanysý úderisin qysqartyp, qyzmetkerlerden keletin ıdeıalardyń sanyn arttyrýǵa múmkindik beredi. Búginde olardyń 47 paıyzy júzege asyrylyp jatsa, 8 paıyzy qarastyrylýda.
Sonymen qatar, oqýshylarǵa arnalǵan saıt, «BIG-dream» daıyndyq ortalyǵy, qýyrylǵan balmuzdaq óndirisi sııaqty ózge de jobalar vedomstvo basshysynyń nazaryna usynyldy.