Ekibastuzdyq palýan ekinshi márte «Pavlodar barysy» atandy
ASTANA. QazAqparat - Ekibastuzdyq Arman Mahambetov 2018 jylǵy «Pavlodar barysy» ataǵyna ıe boldy, dep habarlaıdy pavlodarnews.kz.
Qazaq kúresinen ótken bıylǵy týrnırge Lebıaji aýdanynan basqa barlyq aýdandar men qalalardan 27 palýan qatysty. 90 keliden joǵary salmaqtaǵy palýandar beldesetin básekeni jergilikti demeýshiler qoldap, júlde qory bir mıllıon teńgeni qurady. Týrnır qorytyndysy boıynsha úshinshi oryndy ekibastuzdyq Ádilet Nurpeısov ıelenip, 100 myń teńge oljalady. Al, Pavlodar qalasynyń úmitkeri Serik Sálmenov ekinshi orynǵa qol jetkizip, 300 myń teńge syılyqty ıelendi. Kilem ústine shyqqan kileń myqtylarmen tórt kezdesý ótkizgen ekibastuzdyq Arman Mahambetov básekedegi eń jeńil 90 keli salmaqtaǵy palýan bola tura qarsylastarynyń barlyǵyn jyǵyp «Pavlodar barysy» atandy.
«Meniń qarsylasym - dzıýdoshy. Biz kópten beri kúresip kelemiz. Onyń salmaǵy aýyr. Biraq odan aılamdy asyra bildim. Men 2015 jyly «Pavlodar barysy» atanǵanmyn. Keıin birneshe jyl salmaǵym jetispegendikten qatysa almadym. Bıyl taǵy da utyp, ózimniń bul ataqqa laıyq ekenimdi dáleldedim. 2015 jyly «Qazaqstan barysynda» úsh aınalymnan ótken bolatynmyn. Bıyl jeńil salmaqtaǵylar da jeńe alatynyn dáleldep, jurt nazaryn aýdartpaqpyn»,- deıdi Arman Mahambetov.
Jeńimpazǵa 500 myń teńgelik sertıfıkatty oblys ákimi Bolat Baqaýov tabys etti.
Aıta keteıik, maýsym aıynda ótetin respýblıkalyq «Qazaqstan barysy» básekesinde óńir namysyn Serik Sálmenov pen Arman Mahambetov qorǵaıtyn bolady.
