Ekibastuzdyq órt sóndirýshiler ájesi men nemeresin qutqardy
Órt týraly habarlama № 2 mamandandyrylǵan órt sóndirý bólimine 1 qańtarda saǵat 17:55-te kelip tústi. Órt M.Áýezov kóshesindegi bes qabatty turǵyn úıdiń ekinshi qabatynyń tórtinshi kireberisinde bolǵan. Qutqarýshylar kelip, eki bólmeli páterdiń zalyndaǵy zattardyń jáne 12 sharshy metr balkonnyń janyp jatqanyn anyqtady. Qatty ystyqtan plastık tereze balqyp ketken. Nátıjesinde qoıý tútin shyqqan.
Ústińgi qabattaǵy páterlerdiń birinde áıel adam nemeresimen birge qalyp qoıǵany jaıly bir áıel habarlady.
Bólimshe komandıri Aınar Kendırov besinshi qabattan úshinshi qabatqa deıin 45 jastaǵy áıeldi kóterip alyp syrtqa shyǵarǵan.
Qaraýyl bastyǵy Beısenbaı Syzdyqov besinshi qabattan baspaldaqpen 2019 jylǵy balany kóterip alyp shyqty. Jedel járdem qutqarylǵandardy qarap shyǵyp, aýrýhanaǵa jatqyzýdyń qajeti joq ekendigi anyqtady.
Sondaı-aq, órt sóndirýshilerdiń súıemeldeýimen taǵy bir adam ózdiginen evakýatsııalandy, órt sóndirý bólimsheleri kelgenge deıin 6 adam syrtqa shyǵyp úlgergen. Onyń bireýi bala.
Órt saǵat 18:30-da sóndirildi.
Mamandardyń órttiń shyǵýyna joǵarǵy qabattan laqtyrylǵan temeki sebepshi bolýy múmkin degen boljam jasady.
Órt ornynda Pavlodar oblysy TJD jeke quramynyń 7 adamy men 1 tehnıkasy, «103» qyzmeti, qalalyq elektr jelisi jumys istedi.
