Ekibastuzdyq oqýshy qyz taekvondodan Álem kýboginiń chempıony atandy
ASTANA. QazAqparat - Belarýs astanasy Mınsk qalasynda taekvondo ITF boıynsha Álem kýbogi ótýde. Jarysqa 35 memleketten 2000-ǵa jýyq sportshy qatysty, dep habarlaıdy Ekibastuz ákimdiginiń dene shynyqtyrý jáne sport bólimi.
Qazaqstan Respýblıkasynyń namysyn Pavlodar oblysynyń ITF Taekvondo federatsııasynyń tórt sportshysy qorǵady: Alı Ýzhanov, Rústem Nurov, Gúljamal Myrzahan, Alına Sambýeva. Sportshylar - Ekibastuz qalasy 1-BJSM-niń taekvon-do bóliminiń aǵa-jattyqtyrýshysy Azamat Shakılovtyń tárbıelenýshileri.
Jarystyń qorytyndysy boıynsha Alı Ýzhanov 45 keli salmaq dárejesinde 14-15 jastaǵy jasóspirimder arasynda kúmis júldeger atandy. Ol №21 JOBBM-niń 10-synyp oqýshysy. 7 jyldan beri sportpen shuǵyldanady. Bir aı buryn Qazaqstan Respýblıkasynyń sport sheberi ataǵyna ıe bolǵan.
Nýrov Rýstam 35 keli salmaq dárejesinde kadetter arasynda júldeli ekinshi oryndy jeńip aldy. Rýstam №24 JOBBM-niń 7-synyp oqýshysy. Taekvondomen 4 jyldan beri aınalysady.
Alına Sambýeva tuǵyrdyń ekinshi satysyna kóterildi. Júldeger Abaı Qunanbaev atyndaǵy №2 JOBBM-niń 5-synyp oqýshysy. Sporttyń bul túrimen nebári 3 jyl aınalysady.
Sondaı-aq, Gúljamal Myrzahan 2017 jylǵy Álem kýboginiń chempıony ataǵyna ıe boldy. Ótken jyly ol birinshi oryndy ıemdengen bolatyn. Gúljamal Abaı Qunanbaev atyndaǵy №2 JOBBM-niń 7-synyp oqýshysy. Sporttyń bul túrimen 1-synyptan bastap aınalysady.
