Ekibastuzdyq muǵalim oqýshylardyń yntasyn oıatý úshin túrli oıyn tehnologııalaryn qoldanady
Bilim jáne ǵylym mınıstrligi taratqan málimetke sensek, Darııa Doshımova Pavlodar oblysy Ekibastuz qalasyndaǵy №35 mektep-gımnazııasynda «Kásipkerlik jáne bıznes negizderi» páninen sabaq beredi.
Sondaı-aq ol Youtube jelisinde bilim berý kanalyn júrgizedi jáne jalpy bilim beretin pánderdi oqytýda geımıfıkatsııa ádisin paıdalanýdy engizip júr.
Sonymen qatar pedagog Ekibastuzda Respýblıkalyq jas kásipkerler klýbyn qurǵan. Klýbtyń prezıdenti - qalalyq №35 mekteptiń 10 «A» synyp oqýshysy.
Búginde klýbtyń fılıaldary Semeı jáne Qyzylorda qalalarynda da ashylǵan. Darııa Doshımova oqýshylar arasynda oıyn týrnırlerin uıymdastyrýǵa atsalysyp turady.
Ustaz bilim salasynda 15 jyldan astam ýaqyt jumys isteıdi. Osy jyldar ishinde Darııa Doshımova oqytýdyń túrli ádisterin oılap tapqan.
Búginde ol – júzdegen shákirt tárbıelegen ustaz.
Shákirtteri Darııa Salavatovna jumysqa shyǵarmashylyq kózqaraspen qaraıtyn kásibı maman ekenin aıtady.
«Qazirgi zamannyń balalaryn Internetten alshaqtatý úshin oǵan balama retinde ústel oıyndaryn oılap tabýdamyz. Óıtkeni, shynaıy ómirdegi zııatkerlik oıyn onlaın oıyndarǵa qaraǵanda áldeqaıda paıdaly jáne qyzyqty. Balalar ýaqytyn qyzyqty ári tıimdi ótkizgenin qalaımyn. Ekonomıka jáne qarjylyq saýattylyq baǵyttary boıynsha ústel oıynyn negizge alyp otyrmyn. Ol oıyndy balalar jeti saǵat boıy úzilissiz oınaıdy. Bul ústel oıyny balaǵa qarjylyq saýattylyqty úıretedi. Endi men oqýshylar basqa pánderdi de qyzyǵýshylyqpen oqýy úshin osyndaı oıyndardy engizýdi josparlap otyrmyn. Kásipkerlik negizderimen tanysý úshin ótkiziletin oıyndarǵa qatysqan mektep oqýshylary men kolledj stýdentteri pándi oqytýdyń osyndaı ádisteri olarǵa unaıtynyn aıtady», – dedi Darııa Doshımova.
Sonymen qatar ustaz basqa salalarda da jaqsy jetistikterge jetken.
Ol - Pavlodar oblysy pedagogteriniń arasynda shańǵy jarysynyń altyn júldegeri, basketbol oıyndarynyń segiz dúrkin júldegeri, sondaı-aq atý jarystarynyń júldegeri.
Qazirgi ýaqytta Darııa Doshımova shet tilder men psıhologııa salasyn meńgerýde. Bolashaqta túrli urpaq ókilderine arnalǵan bilim berý kitabyn shyǵarýdy josparlap júr.
