Ekibastuzdyq dızel otynyn zańsyz satyp, 47 mln teńge paıda kórgen
ASTANA. QazAqparat - Ekibastuz qalasynyń turǵyny jeke kásipkerlikke deıin tórt aı ishinde zańsyz 500 tonna kóleminde dızel otynyn satyp, 47 mıllıon teńge shamasynda tabys tapqan.
Bul týraly óńirlik kommýnıkatsııalar qyzmetinde «Pavlodar oblysy boıynsha MKD-niń ekonomıkalyq tergeý qyzmeti jumysynyń nátıjeleri» taqyrybynda ótken baspasóz jıynynda Pavlodar oblysynyń memlekettik kirister departamenti kólenkeli ekonomıkaǵa qarsy is-qımyl basqarmasynyń basshysy Azamat Beısembaev málim etti, dep habarlaıdy pavlodarnews.kz.
«Ol óz qalasynda zańsyz dızel otynyn saýdalaǵan. Qarasha aıynan bastap aqpan aıyna deıin kóleńkeli bıznespen aınalysqan azamat 47 mıllıon teńge tabys tapqan. Tekseris barysynda órtten saqtandyrý talaptary saqtalmaǵany anyqtaldy. Janar-jaǵarmaı qala syrtyndaǵy garajdardyń birinen tabyldy. Nátıjesinde memleketke keltirilgen shyǵyndy óteý maqsatynda 57 mıllıon teńge kóleminde aıyppul salyndy, - dedi Azamat Beısembaev. Budan basqa, Ekibastuz qalasynda erli-zaıyptylar tólenbegen salyq túrinde memleketke 644 mln teńge shyǵyn keltirgen. Olar bes jyldan astam ýaqyt boıy is júzinde taýarlardy tasymaldaý boıynsha qyzmet atqarmasa da, kelisimder jasap kelgen. Kúdikke ilingender tergeýden qashqaqtaǵandyqtan olarǵa izdeý salynyp, ekeýi de ustalǵan. Búginde qylmystyq is aıaqtalyp, sottyń qaraýyna joldandy.
