Ekibastuzdyq 50 bala qysqy demalysyn Túrkistanda ótkizedi
Búgin mektep oqýshylary men olarǵa ilesip kelgen azamattar Túrkistan óńirine kelip jetti. «AMANAT» partııasy Túrkistan oblystyq fılıalynyń tóraǵasy Altynsary Úmbetálıev, oblystyq máslıhat depýtaty Qalyıma Kalyıma Jantoreeva jáne jaýapty mekeme ókilderi olardy temirjol vokzalynan kútip aldy.
«Bizdiń óńirge tańdaýy túsken 50 bala, olarmen birge kelgen 6 súıemeldeýshi jáne 1 dáriger Tólebı aýdanynda ornalasqan «Báısheshek» demalys aımaǵyna ornalastyryldy. Jalpy 15 jasqa deıingi mektep oqýshylary qamtylyp otyr. Balalar 11 qańtarǵa deıin josparǵa saı túrli baǵyttaǵy is-sharalarǵa qatysady. Túrkistandaǵy Q.A.ıAsaýı kesenesine de saıahat jasaý josparlanýda. Partııanyń bul bastamasy balaqaılarǵa erekshe serpin syılaıtyny anyq», - dedi Altynsary Úmbetálıev.
Kóterińki kóńil-kúıge ıe bolǵan mektep oqýshylary taýly aımaqtyń tabıǵatyna tamsanyp, oıyn-saýyqqa birden kiristi. Al 8-synyp oqýshysy Ámına Kerimqulova Túrkistandaǵy tarıhı oryndarǵa saıahat jasaýǵa asyq.
«Ekibastuz qalasynan Túrkistan oblysyndaǵy lagerge kelgenime qýanyshtymyn. Ózimdi jaıly sezindim. Poıyzda dostarymmen birge oıyndar oınap, áńgimelesip, ýaqytymyz qyzyqty ótti. Basqa mekteptiń oqýshylarymen de tanysyp, dostasyp kettik. Túrkistan - ártúrli kesenelerimen, murajaılarymen tanymal. Ata-ájemmen birge buǵan deıin kelgenmin. Biraq kishkentaı bolǵan soń esimde saqtalmaǵan. Sondyqtan qazir osyndaı múmkindik bergenderine rızamyn», - dedi ol.
Saýyqtyrý lagerindegi is-sharalardy úılestirýge partııanyń aımaqtyq fılıaly, oblys ákimdigi jáne oǵan qarasty bilim, sport, densaýlyq saqtaý basqarmalary atsalysýda. Jalpy respýblıka boıynsha 1300 mektep oqýshysyna shıpajaılar men sporttyq-saýyqtyrý keshenderine barýyna jaǵdaı jasalady.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
28 qarasha kúni qalada jergilikti aýqymdaǵy tótenshe jaǵdaı jarııalandy. Oqýshylar onlaın oqýǵa kóshirildi
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııa jetkiliksizdigi ataldy.
7 jeltoqsanda barlyq kópqabatty úı jylýǵa qosylǵany málim boldy.
8 jeltoqsanda Prezıdent Qasym-Jomart Toqaevqa esep bergen Pavlodar oblysynyń ákimi Asaıyn Baıhanov Ekibastuzdaǵy jylý júıesin qalpyna keltirý 15 jeltoqsanǵa deıin aıaqtalatynyn aıtty. Osy kúni qalada tótenshe jaǵdaı rejımi alyndy.
12 jeltoqsanǵa deıin 4 jer úıden basqa turǵyn úılerdiń barlyǵyna jylý berildi.
Bas prokýratýra Ekibastuzdaǵy apatty tergeý eki aıǵa deıin sozylatynyn málim etti.
