Ekibastuzdaǵy jylý júıesin jóndeý 15 jeltoqsanǵa deıin aıaqtalady - Pavlodar oblysynyń ákimi
Pavlodar oblysynyń ákimi Asaıyn Baıhanov Prezıdentke Ekibastuz JES-iniń jylý jelilerindegi apattyń saldaryn joıýǵa baǵyttalǵan sharalar jóninde esep berdi. Aıtýynsha, Ekibastuz qalasynyń jylý júıesin qalpyna keltirý jumystary 15 jeltoqsanǵa deıin aıaqtalady.
Sondaı-aq, oblystyń negizgi áleýmettik-ekonomıkalyq kórsetkishteri jáne aýyl sharýashylyǵyn damytý, aýyl halqyn sapaly aýyzsýmen qamtamasyz etý, kólik ınfraqurylymy men turǵyn úı qurylysyn damytý jónindegi tapsyrmalardyń oryndalý barysy baıandaldy.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqýǵa kóshirildi.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Apat sebebi retinde jylý jelileriniń tozýy, jylý ortalyǵy basshylyǵynyń nemquraılylyǵy men ınvestıtsııalardyń jetkiliksizdigi ataldy.
Memleket basshysynyń tapsyrmasy boıynsha Premer-Mınıstrdiń birinshi orynbasary Roman Sklıar qalalyq jylý jelilerindegi apattyń saldaryn joıý jónindegi jumystar aıaqtalǵansha Ekibastuzda bolatyny habarlandy.
4 jeltoqsanda Roman Sklıar telefon arqyly Úkimet basshysy Álıhan Smaıylovqa qalalyq jylý jelilerindegi apattyń zardaptaryn joıý barysy týraly baıandady.
Sondaı-aq, Prezıdent Qasym-Jomart Toqaev Ekibastuzdaǵy jóndeý jumystarynyń barysy týraly Premer-Mınıstrdiń baıandamasyn tyńdady.
Foto: t.me/Kzgovernment