Ekibastuzdaǵy jaǵdaı: Jylý qubyryndaǵy aqaýdy joıý jumystary taǵy eki magıstralda jalǵasýda
Mamandar 17 kópqabatty úı men 4 áleýmettik nysanǵa jylý berýdi qalpyna keltirýde, bul jumystarǵa 143 adam men 30 tehnıka jumyldyryldy, dep habarlady Pavlodar oblysy ákiminiń baspasóz qyzmeti.
Stantsııadaǵy temperatýra 75°C-ge deıin kóterildi. «OAEK» AQ Basqarma tóraǵasy Baǵdat Oraldyń aqparaty boıynsha negizgi apattyq ýchaske anyqtaldy.
«Apat №52 ortalyq jylý pýnktinde ornalasqan. Barlyq kúshter osynda shoǵyrlandyq. Biz asfalt qabatyn alyp tastap, qubyrdyń ózine jettik. Qubyrdy aýystyrǵan soń jylý jelisine qosyla bastaımyz», - dep túsindirdi Baǵdat Oral.
Energetıka mınıstrliginiń Atom jáne energetıkalyq qadaǵalaý jáne baqylaý komıtetiniń tóraǵasy Suńǵat Esimhanov apat boıynsha tergeýdiń bastalǵanyn málimdedi.
«Búgin JEO basshylyǵy resmı túrde habardar etildi. On jumys kúni ishinde tergeýdi aıaqtap, qorytyndyny habarlaımyz. Kásiporyndardyń táýlik boıy kezekshiligin uıymdastyrdyq. Jelidegi jylýdan ajyratý jumystary servıstik kompanııalarmen birlesip pysyqtaldy», - dedi Esimhanov.
«Ekibastuzjylýenergo» JShS quryltaıshysy Aleksandr Klebanov kompanııanyń aqaýdy joıý úshin qajetti resýrstary bar ekenine sendirdi. Sondaı-aq, apattyń saldaryn joıýǵa qalanyń basqa da ónerkásiptik kásiporyndarynyń kúshteri jumyldyryldy.
«Biz jeke kompanııa retinde bolǵan jaǵdaıǵa tolyq jaýap beremiz. Munda quqyq qorǵaý organdary men prokýratýranyń qatysýymen komıssııa qurylatyny sózsiz. Olar bárin muqııat qarastyrady. Buǵan biz de múddelimiz», - dedi Aleksandr Klebanov.
Pavlodar oblysy ákiminiń mindetin atqarýshy málimetinshe, qazirgi kezdegi basty mindet – úılerdi jylýmen jabdyqtaýdy qalpyna keltirý.
«Bári problemany tolyqtaı túsinip otyr, naqty sheshimder qabyldaý qajet. Biz osy maqsat úshin jınaldyq. Negizgi mindet – tez arada jylýmen jabdyqtaý júıesin qalpyna keltirý. Biz barlyq kúsh pen resýrstardy qoldanamyz. Sondyqtan bárimiz qaladaǵy jylýmen jabdyqtaý júıesi shtattyq rejımde iske qosylmaıynsha, bul jerden ketpeımiz. Turǵyndar bizden tek osyny kútedi», - dep atap ótti Ábilqaıyr Sqaqov.
Esterińizge sala keteıik, Ekibastuzda jylý magıstraldaryndaǵy zaqymdarǵa baılanysty tehnogendik sıpattaǵy TJ jarııalandy. Qalada jedel shtab ashylyp, evakýatsııalyq pýnktter men shuǵyl qońyraý jelisi jumys istep tur.