Ekibastuzdaǵy tótenshe jaǵdaı: Turǵyndarǵa ótemaqy tólenedi
Ekibastuz qalasynyń aýmaǵynda tehnogendik sıpattaǵy TJ rejımin engizý nátıjesinde qala ákimi ystyq tamaqpen jáne demalys oryndarymen qamtamasyz ete otyryp, jylytý pýnktterin uıymdastyrýda.
«Ekibastuz qalasy ákimdiginiń málimetinshe, tótenshe jaǵdaı kezinde shyǵynǵa ushyraǵan azamattar qala ákiminiń atyna erkin nysandaǵy ótinishpen júginedi. Ótinishte ótinish berýshiniń derektemeleri (jeke basyn kýálandyratyn qujattyń kóshirmesi), naqty turǵylyqty jeriniń mekenjaıy, zaqymdaný sebebi kórsetilýi tıis. Ótinishterdi tirkegennen keıin ákimdik turǵyn úıge zalaldy odan ári óteý úshin anyqtaýmen komıssııalyq tekserý júrgizedi», – deıdi ákimdikte.
Ótinishter kún saıyn saǵat 09.00-den 18.30-ǵa deıin myna mekenjaılar boıynsha jylytý pýnktilerinde qabyldanady:
1) № 17 orta mektep – Rabochaıa kóshesi, 1;
2) № 4 orta mektep – Abaı kóshesi, 84;
3) № 23 orta mektep – Sátbaev kóshesi, 24;
4) № 36 orta mektep – Sátbaev kóshesi, 23;
5) № 22 orta mektep – Áýezov kóshesi, 54a;
6) № 21 orta mektep – Petrenko kóshesi, 7;
7) «Óner» MKK – Áýezov kóshesi, 62a;
8) Mýzykalyq mektep – Áýezov kóshesi, 55/1.
27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.
Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Búgin Ekibastuz qalasynyń oqýshylary onlaın oqıtyny habarlandy. Qala ákiminiń aıtýynsha, 3 shaǵynaýdanǵa áli jylý berilgen joq.
28 qarasha tańerteń qalada jergilikti aýqymdaǵy tótenshe jaǵdaı jarııalandy.
Jalpy aıta ketsek, Ekibastuz qalasy boıynsha jalpy 422,5 km jylý jelileri bar. «Ekibastuzteploenergo» JShS balansynda 342,3 km, olardyń tozý deńgeıi 91% quraıdy.Ekibastuz JEO–da 10 qazandyq ornalasqan, onyń ishinde 5 energetıkalyq, 5 sý jylytý qazandyǵy. Ekibastuz qalasynda 689 kóppáterli úı jáne ortalyq jylýmen jabdyqtaýǵa qosylǵan 4 395 jeke úı bar.
Foto: «Pavlodarenergo» AQ
