Ekibastuzdaǵy saýda ortalyqtarynda órt qaýipsizdigi buzylǵany anyqtaldy
EKІBASTUZ. QazAqparat - Ekibastuzdaǵy saýda ortalyqtarynda órt qaýipsizdigi talaptary tekserildi, dep habarlaıdy QazAqparat tilshisi.
Arnaıy komıssııa tekserý júrgizgen nysandardyń eshqaısysy talapqa saı emes ekeni anyqtaldy.
«Bas prokýratýranyń tapsyrmasymen tótenshe jaǵdaı basqarmasynda Ekibastuzdaǵy iri saýda úılerinde jospardan tys tekserý boldy. Oǵan «Nur Otan» partııasynyń ókilderi, depýtattar, jýrnalıster de qatysty. 6 saýda ortalyǵyn tekserip úlgerdik. Bárinde órt qaýipsizdigi erejeleriniń saqtalmaǵany anyqtaldy. Tekseris qorytyndylary boıynsha olardyń basshylaryna jasalýy qajet jaıttar týraly uıǵarym shyǵarylady», - deıdi Ekibastuz tótenshe jaǵdaılar basqarmasynyń bastyǵy Aıdyn Qajybekov.
Saýda ortalyqtaryndaǵy tekserister aldaǵy eki aptada da jalǵasyn tabady. Sodan keıin olardyń basshylary anyqtalǵan kemshilikterdiń barlyǵyn retteýge mindetteledi.
