Ekibastuzdaǵy saýda ortalyǵynyń órt qaýipsizdigi tekserildi
EKІBASTUZ. QazAqparat - Ekibastuzdaǵy saýda ortalyǵynda ondaǵy qyzmetkerler men qala turǵyndarynyń kenet tutanǵan órtke daıyndyǵy tekserildi, dep habarlaıdy QazAqparat tilshisi.
Aýqymdy oqý-jattyǵýlar kezinde ekibastuzdyqtarǵa órt kezinde artyq dúrlikpeı, tótenshe jaǵdaıdan shyǵýdyń joldary túsindirildi.
Ekibastuzdyń iri saýda ortalyqtarynyń birinde tórtinshi qabatta «jasandy órt» uıymdastyryldy. Órt dabyly soǵylǵannan keıin ondaǵy barlyq adam evakýatsııalandy. Qutqarý qyzmetteri jumysqa kiristi. Órtti sóndirýge órt sóndirý bólimsheleriniń daıyn tórt brıgadasy, sonymen qatar polıtsııa jáne jedel járdem qyzmetkerleri keldi.
«Saýda ortalyǵynda tórt baspaldaq bar, habarlandyrý qyzmeti istep tur. Tórtinshi qabattaǵy kınozaldardy tekserdik. Shartty túrde tutandyrylǵan órt kezinde dabyl iske qosylyp, kınoseans toqtatyldy, adamdar zaldan shyǵa bastady. Kınozaldar syrtynan jabylmaıdy. Kelýshilerge órt dabyly qosylǵan kezde baspaldaqpen jyldam ǵımarattan shyǵý jáne lıftige kirmeý qajettigin aıttyq», - deıdi Ekibastuz tótenshe jaǵdaılar basqarmasynyń bas mamany Jomart Maımanov.
«Oqıǵa ornyna» shuǵyl jetken órt sóndirýshiler jumysqa kiristi: avtobaspaldaqpen tórtinshi qabatqa kóterilip, shatyrdaǵy jalyndy sóndirdi.
Qutqarýshylardyń aıtýynsha, saýda ortalyǵynyń barsha qyzmetkeri qalalyqtardyń kóshege shyǵýyna kómektesip, jedel qyzmetterdiń jumysyna kedergi jasamaǵan.
