Ekibastuzdaǵy kópbalaly otbasylar úshin turǵyn úı satyp alýǵa 250 mln teńge bólinedi

PAVLODAR. QazAqparat - Pavlodar oblysynyń ákimi Bolat Baqaýov Ekibastuzǵa jasaǵan jumys sapary barysynda úıleri joq kópbalaly otbasylar úshin 30-dan 40-qa deıin páter alynatyny týraly málimdedi, dep habarlaıdy pavlodarnews.kz.

Oblys ákiminiń Ekibastuzdaǵy kópbalaly analarmen kezdesýi «Qaınar» bilim berý-saýyqtyrý kesheninde ótti.

Ákimniń aıtýynsha, búginde Pavlodar oblysynda kópbalaly otbasylarǵa qatysty máselelerdi sheshýdiń keshendi tásili bar.

«Qıyn jaǵdaıdaǵy árbir kópbalaly otbasy bizdiń nazarymyzda», - dedi óńir basshysy.

«Ár otbasynyń áleýmettik pasporty jasaldy. Jalpy alǵanda, oblysymyzdaǵy kópbalaly otbasylardyń áleýmettik qajettilikterin sheshý úshin 3,8 mıllıard teńge bólindi. Bul - balabaqshalarǵa barý, azyq-túlik, qoǵamdyq kólikpen júrý bıleti, jazǵy lagerlerde demalý jáne mektepke qajetti zattar satyp alý. Alaıda, bastysy - turǵyn úı máselesi bolyp tabylady. Biz ony birte-birte sheshemiz»-deıdi ákim.

Qazirgi ýaqytta bıýdjetten ekinshi deńgeıli naryqtan turǵyn úı satyp alýǵa 250 mln teńge bólingen. Jalǵa beriletin turǵyn úı retinde shamamen 30-40 páter kópbalaly otbasylarǵa beriledi. Bul jumys aldaǵy 3-4 aıda júzege asyrylady. Budan basqa, kelesi jyly Ekibastuzdyń JTÚQ shaǵyn aýdanynda eki páterli baspana salýdy bastaý josparlanǵan. Degenmen, oǵan deıin bılik bul shaǵyn aýdanǵa jylý júıesin salý úshin kommýnıkatsııa tartýy tıis.

Sondaı-aq Bolat Baqaýov oblystyń bıligi «Samuryq-Qazyna» qorynyń ókilderimen Solnechnyı kentindegi bos turǵan kópqabatty ǵımarattardy jergilikti atqarýshy organdarǵa berý týraly kelissózder júrgizip jatqandyǵyn aıtty. Ol ǵımarattar bir kezderi 2-MAES úshinshi energoblogynyń bolashaq qyzmetkerleri úshin salynǵan.

Aıta keteıik, búgingi kúni 233 kóp balaly ana turǵyn úı kezeginde tur.