Ekibastuzdaǵy GRES-1 stansysynyń qýatyn 2015 jylǵa deıin 4000 MVt-qa arttyrý kózdelip otyr
ASTANA. Sáýirdiń 8-i. QazAqparat - Búgin Ekibastuzdaǵy GRES-1 (EGRES-1) stansysynda Pavlodar óńirindegi energııa generatsııalaýshy kásiporyndardyń basshylary oblys ákimi Baqytjan Saǵyntaevqa ózderiniń ınvestıtsııalyq mindettemeleriniń oryndalý nátıjelerin usyndy,
dep habarlaıdy QazAqparat.
Qazaqmys Toby baspasóz qyzmetinen málim etkendeı, kompanııa GRES-1 stansysynyń operatsııalyq qyzmetinen alynǵan paıdany atalmysh stansyny qaıta jańǵyrtýǵa ınvestıtsııalaǵan. Salyqtar tólengenge deıingi esep boıynsha qalyptasqan bundaı paıda 12 mıllıardtan astam teńgeni qurady.
«Jyl ishinde elektr stansynyń №3, 4, 6 jáne 7-shi energobloktaryna aǵymdaǵy jóndeýler jáne №5-shi energoblokqa tehnıkalyq qaıta jaraqtandyrý men kúrdeli jóndeý júrgizildi. Barlyq jumystar josparlanǵan merzimnen buryn aıaqtalyp, sol arqyly 2009 jyldyń úshinshi jáne tórtinshi toqsandarynda qosymsha elektr energııasyn óndirýge múmkindik týdy», - delingen aqparatta.
2009 jyldyń jeltoqsan aıynda EGRES-1 stansysyn qaıta jańǵyrtýdyń negizgi kezeńi bastaldy. 2013 jylǵa deıin onyń qýatyn 2500-den 3000 MVt-qa deıin arttyrý josparlanyp otyr. Jalpy alǵanda, EGRES-1-diń 2009-2015 jyldarǵa baǵyttalǵan ınvestıtsııalyq baǵdarlamasy 180 mlrd. teńgeni quraıdy. Onyń nátıjesi boıynsha stansynyń óndiristik qýaty 4000 MVt-qa deıin jetedi dep kútilýde.
«Elektr stansysynyń ınvestıtsııalyq baǵdarlamasy operatsııalyq paıdadan qaıta ınvestıtsııalaýdyń esebinen qarjylandyryldy. Soǵan baılanysty aktsıonerlerge dıvıdendter tólemeýge sheshim qabyldandy. Aldaǵy ýaqytta da biz, uzaq merzimdi ınvestıtsııalyq baǵdarlamany ýaqytyly oryndap otyrýǵa jáne Qazaqstannyń energetıkalyq qaýipsizdigin qamtamasyz etýge úles qosýǵa yntalymyz», - dep atap ótti Toptyń energetıkalyq departamentiniń dırektory Nıkolaı Korobovskıı.
