Ekibastuzdaǵy dala órtinen sharýa qojalyǵynyń usaq maldary tirideı janyp ketti
Eki kún ishinde oblystyq tótenshe jaǵdaılar departamentiniń Ekibastuz garnızony órtti sóndirýge 10 ret shaqyrtý aldy.
Tótenshe jaǵdaılar departamentiniń málimdeýinshe, 13 shilde kúni saǵat 9:25-te Marǵulan aýyly mańynda qurǵaq shóptiń janyp jatqany týraly habarlama kelip túsken.
Oqıǵa ornyna órt sóndirý qyzmetteri, erikti órt sóndirý bólimsheleri men jergilikti atqarýshy organdar attandy.
Tilsiz jaý 14 shilde kúni saǵat 07:35-te tolyǵymen sóndirildi. Órt sóndirýshilerdiń jumysyna ekpindi jel kedergi keltirgen.
- 14 shildede júrgizilgen tekserý barysynda dalada bolǵan órt saldarynan Marǵulan aýylyndaǵy «Qýanysh» sharýa qojalyǵynyń usaq maldary jartylaı janyp, kóptegen qoılar kúıip ketkeni anyqtaldy, - delingen habarlamada.
Dala órtinen kem degende 16 usaq mal ólgeni belgili boldy.
Eske sala keteıik, 14 shilde kúni saǵat 12:45-te Baıanaýyl aýdanynda Qyzyltaý aýylynan 20 shaqyrym jerde ashyq jerde qurǵaq shóp órtengen bolatyn. Órt aýyzdyqtalǵanymen onyń tolyqtaı joıylǵany týraly quzyrly organ málimdemedi.
Al otqa abaısyz qaraýdyń saldarynan Ekibastuz aýyldyq okrýginde alapat órt oryn aldy. Shıqyldaq aýyly mańyndaǵy órt ǵaryshtyq monıtorıng arqyly anyqtaldy.
Budan bólek, eki kún boıy órt sóndirýshilerdi ábigerge salǵan Sharbaqtydaǵy orman órtimen kúres áli de júrip jatyr. Sońǵy aqparatqa súıensek, orman órti 850 gektar alqapty sharpyǵan.