Ekibastuzdaǵy «Bogatyr Kómir» seriktestigi orta býyn basshylarynyń qylmysy ashyldy

EKІBASTUZ. QazAqparat – Qarjylyq monıtorıng agenttiginiń Pavlodar oblysy boıynsha departamenti Ekibastuz qalasyndaǵy «Bogatyr Kómir» JShS orta býyn basshylarynyń qylmystyq áreketin anyqtady. Bul týraly QazAqparat Agenttiktiń baspasóz qyzmetine silteme jasap habarlaıdy.

Avtobaza dırektory seriktestikte basshylyq qyzmet atqaratyn basqa laýazym ıelerimen júıeli túrde taýarlyq-materıaldyq qundylyqtardy urlap, 45,5 mln teńge kóleminde zalal keltirgen degen kúdikke ilindi.

Qylmystyq shema boıynsha kólik quraldarynyń qosalqy bólshekteri esepten shyǵarylyp, jańasyn alý jáne olardy ornatýdy ımıtatsııalap, qujattarǵa qol qoıylǵan. Jańa qosalqy bólshekter bolmaǵandyqtan, arnaıy tehnıka isten shyǵyp, uzaq ýaqyt jumys istemeı turǵan. Al, kúdiktiler jańa qosalqy bólshekterdi satyp otyrǵan. Ustalǵandardan urlanǵan júk kólikteriniń qozǵaltqyshtary men berilis qoraptary tárkilendi.

Sot olardyń kinásin tolyq moıyndaýyna baılanysty «úıqamaq» túrindegi bultartpaý sharasyn qoldandy.

Atalǵan fakti boıynsha sotqa deıingi tergeý amaldary júrgizilip jatyr. Tergeý múddesinde basqa aqparat jarııa etilmeıdi.