Ekibastuzdaǵy apatty joıý jumystary qalaı júrgizilip jatyr

ASTANA. QazAqparat - Ekibastuz qalasyndaǵy jylý elektr ortalyǵynda bolǵan apatqa baılanysty shtab quryldy. Bul týraly IIDM silteme jasap habarlaıdy.

Qalpyna keltirý jumystaryna 138 adam jáne 35 tehnıka jumyldyrylǵan. Buǵan deıin habarlanǵandaı 15 zaqymdanýdyń 14-i joıylyp, qazirgi ýaqytta jumystar jalǵasýda.

28 qarashadaǵy saǵat 15.30-daǵy jaǵdaı boıynsha qazandyqtaǵy jylý berý temperatýrasy 84ºS (norma – 87ºS), keri qaıtarý – 54ºS (norma – 56ºS), páterlerdegi temperatýra 18-20ºS quraıdy. 6 qazandyq agregat (№ 6,8,9,12,14,15) jumys istep tur, rezervte 4 qazandyq agregat (№ 5,7,11,13) bar. Elektr energııasyn tutyný 51 MVt qurady.

Emdeý mekemelerindegi temperatýralyq rejım kúni boıy qalypty jáne 20-25ºS sheginde saqtalyp otyr. Bul sanıtarlyq normalarǵa sáıkes keledi.

18 kópqabatty turǵyn úı jáne 3 áleýmettik nysan jylýmen qamtamasyz etilmeı otyr. 52 ýchaskesinde (Máshhúr Júsip kóshesi boıynsha 5 «a» shaǵyn aýdany) 1 aqaý bar.

Eske sala keteıik, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.

Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.

Búgin Ekibastuz qalasynyń oqýshylary onlaın oqıtyny habarlandy. Qala ákiminiń aıtýynsha, 3 shaǵynaýdanǵa áli jylý berilgen joq.

28 qarasha tańerteń qalada jergilikti aýqymdaǵy tótenshe jaǵdaı jarııalandy.

Jalpy aıta ketsek, Ekibastuz qalasy boıynsha jalpy 422,5 km jylý jelileri bar. «Ekibastuzteploenergo» JShS balansynda 342,3 km, olardyń tozý deńgeıi 91% quraıdy.

Ekibastuz JEO–da 10 qazandyq ornalasqan, onyń ishinde 5 energetıkalyq, 5 sý jylytý qazandyǵy. Ekibastuz qalasynda 689 kóppáterli úı jáne ortalyq jylýmen jabdyqtaýǵa qosylǵan 4 395 jeke úı bar.