Ekibastuzdaǵy apatpen kúresti aqparattandyrýda kóp qate ketti - saıası sarapshy
«Apatty joıý boıynsha jumystardy jarııalaýda kóptegen qatelikter jiberildi. Birinshi, tótenshe jaǵdaı aýqymyn jasyrý. Jaǵdaı baqylaýda, qorqynyshty eshteńesi joq jáne másele jaqyn arada sheshiledi delindi. Ekinshi, jaǵdaı ýshyqqan soń Ekibastuzǵa vıtse-premer R.Sklıar bardy. Úılerge jylý berilip jatyr dep merziminen buryn habarlama jasap, turǵyndardy tynyshtandyrýǵa tyrysty. Atalǵan jaǵdaılar qala turǵyndary men jalpy qazaqstandyqtardyń yzasyn týdyryp otyr», - dedi N. Shatalov.
Onyń aıtýynsha, birinshi qatelik shuǵyl joıylyp, sheshimin tapty. Al ekinshi qatelik sheneýnikterdiń aqparattyń zamanaýılyǵyn túsinbeýiniń nátıjesi.
«Men aıtqan birinshi qatelik tez túzetildi. Memleket basshysy Frantsııadan qaıtar jolda, meniń bilýimshe, tótenshe jaǵdaıǵa jaýapty sheneýniktermen qatań sóılesti. Sondaı-aq, Úkimetke shuǵyl tapsyrma berdi. Ekinshi qatelik sheneýnikterdiń qazirgi aqparattyq shyndyqty tolyq túsinbeýiniń nátıjesi. Úkimet pen ákimdik Prezıdent Ákimshiliginiń kezekti eskertýinen keıin ǵana aqparattandyrý jumysyna kiristi. Shyndyǵynda, sharýa basqa óńirlerden jumys brıgadalary ekibastuzdyqtarǵa kómekke kelgennen keıin ǵana óne bastady. Mysaly, meniń jerlesterim qaraǵandylyqtar kómekke bardy. Áleýmettik jelilerde qıyn sátte qol ushyn sozǵan jandarǵa aıtylǵan alǵys kóp boldy», - deıdi ol.
Sonymen qatar sarapshy apatqa qaramastan jylý elektr ortalyǵynyń ıesin jaqtaý jaǵdaıynyń bolǵanyn aıtty.
«Bul jerde másele tek tarıfke qatysty emes. Apatqa sebep jylý berý jelileriniń tozýy degen áńgimeler boldy, al JEO-nyń tozyǵy týraly aıtylmady. Úkimet batyldyq tanytyp, shyndyqty uzaqqa sozbaı aıtýy kerek edi. Jylý jelilerindegi aqaýlar JEO qazandyqtary jaǵdaıynyń óte nashar ekenin kórsetti. Kúrdeli jóndeý, jańartý jumystary júrgizilmegen. Osylaısha qalypty qysymdy ustap turý múmkin bolmady. Sebebi aıaz kóterildi de jumysshylar qazandyqtardy bar qýatynda iske qosty. Onyń sońy apatqa alyp keldi, ıaǵnı jeli qysymǵa tótep bere almady. Eger jylý elektr ortalyǵy ýaqtyly qaıta jańartylǵanda jylýmen qamtý máselesi týyndamas edi», - deıdi Nıkıta Shatalov.
Spıkerdiń sózinshe, tozyǵy jetken jylý qazandyqtary apattyń týyndaýyna sebepshi boldy.
«Qazir Úkimette dıversııa boldy degene áńgime aıtylyp jatyr. Bul shyndyqqa saı emes. Olıgarhty aqtaýdy toqtatýdyń ornyna, ádettegideı Mınıstrler kabıneti kináni óz moınyna alady. Qazirdiń ózinde S.Jumanǵarın tarıfti kóterý máselesin kóterip jatyr. Qazir aldymen «TsATEK» AQ-nan nelikten sharýasy bitken aktıvti osyǵan deıin ustap kelip, endi memleketke 1 teńgege usynyp otyrǵanyn qarastyrý kerek», - dep qorytyndylady N. Shatalov.
Eske salaıyq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qaldy.
Keıin jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Aıta ketsek, búgin QR Premer-Mınıstri Álıhan Smaıylov Ekibastuzdaǵy jaǵdaı boıynsha Prezıdentke esep berdi.
Foto: facebook.com/shatalov.nikita