Ekibastuzdaǵy apatqa qylmystyq is sheńberinde baǵa beriledi – Roman Sklıar
«Apat JEO-da bolǵan joq. Tekserýdiń nátıjesi boıynsha qubyrlardaǵy aqaýlar stantsııadaǵy qyzmetkerdiń qate áreket jasaýynan bolǵan. Saldarynan jelidegi qysym artqan. Qysym joǵarylap ketkendikten qubyrlar kóp jerden jarylǵan»», - dedi Roman Sklıar.
Vıtse-premer jylý elektr ortalyǵynyń jaǵdaıy jaqsy bolmasa da, osy ýaqytqa deıin jumys istep turǵanyn atap ótti.
«Jyldar boıy JEO men jeliler qalaı basqarylǵany, basshylar qandaı jumys jasaǵany, qanshalyqty kútip ustalǵany jáne jóndeýlerge qansha qarjy bólingenine qylmystyq is sheńberinde baǵa beriledi», - dep toqtaldy Premer-Mınıstrdiń orynbasary.
Brıfıng barysynda jýrnalıst Ashat Nııazov olıgarh Aleksandr Klebanovtyń qazir qaıda ekenin de surady.
«Aleksandr Klebanov qazir Astanada. Óndiristik máselelerdi sheshýmen aınalysyp jatyr. Ekinshi aktsıoner – Sergeı Kan osynda, ıaǵnı stantsııada. A.Klebanov erteń keledi», - dep jaýap berdi Roman Sklıar.
Premer-Mınıstrdiń orynbasary Aleksandr Klebanovty jaýapkershilkke tartý týraly suraqqa másele boıynsha tıisti tujyrym jasalǵan kezde qarastyrylatynyn aıtty.
27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.
Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Ekibastuz qalasynyń oqýshylary onlaın oqıtyny habarlandy. Qala ákiminiń aıtýynsha, 3 shaǵynaýdanǵa áli jylý berilgen joq.
28 qarasha tańerteń qalada jergilikti aýqymdaǵy tótenshe jaǵdaı jarııalandy.
30 qarashada Ekibastuzǵa Premer-Mınıstr Álıhan Smaıylov baryp, kináliler jaýapqa tartylatynyn aıtty.
Apat sebebi retinde jylý jelileriniń tozýy, jylý ortalyǵy basshylyǵy tarapynan nemquraıdylyq bolǵany jáne ınvestıtsııalardyń jetkiliksizdigi ataldy.
Keshe tańerteń usynylǵan málimetke sáıkes, 17 kópqabatty turǵyn úı ortalyq jylý jelisine áli qosylǵan joq. Onymen qosa, 58 turǵyn úı sýdan ajyratyldy.