Ekibastuzdaǵy apat: Jylý qubyryndaǵy sýdyń atqylaýyn toqtatý birneshe magıstralda jalǵasýda
28 qarasha kúngi saǵat 19:00-degi jaǵdaı boıynsha jylý qubyryndaǵy sýdyń atqylaýyn joıý jumystary taǵy eki magıstralda jalǵasýda dep habarlady jedel shtab. Mamandar 17 kópqabatty úı men 4 áleýmettik nysanǵa jylý berýdi qalpyna keltirýde, bul jumystarǵa 143 adam men 30 tehnıka jumyldyryldy.
Stantsııadaǵy temperatýra 75°C-ge deıin kóterildi. «OAEK» AQ Basqarma tóraǵasy Baǵdat Oraldyń aqparaty boıynsha negizgi apattyq ýchaske anyqtaldy.
«Apat №52 ortalyq jylý pýnktinde ornalasqan. Barlyq kúshter osynda shoǵyrlandyq. Biz asfalt qabatyn alyp tastap, qubyrdyń ózine jettik. Qubyrdy aýystyrǵan soń jylý jelisine qosyla bastaımyz», - dep túsindirdi Baǵdat Oral.
Energetıka mınıstrliginiń Atom jáne energetıkalyq qadaǵalaý jáne baqylaý komıtetiniń tóraǵasy Suńǵat Esimhanov apat boıynsha tergeýdiń bastalǵanyn málimdedi.
«Búgin JEO basshylyǵy resmı túrde habardar etildi. On jumys kúni ishinde tergeýdi aıaqtap, qorytyndyny habarlaımyz. Kásiporyndardyń táýlik boıy kezekshiligin uıymdastyrdyq. Jelidegi jylýdan ajyratýlar servıstik kompanııalarmen birlesip pysyqtaldy», - dedi Esimhanov.
«Ekibastuzjylýenergo» JShS quryltaıshysy Aleksandr Klebanov kompanııanyń aqaýdy joıý úshin qajetti resýrstary bar ekenine sendirdi. Sondaı-aq apattyń saldaryn joıýǵa qalanyń basqa da ónerkásiptik kásiporyndarynyń kúshteri jumyldyryldy.
«Biz jeke kompanııa retinde oryn alǵan jaǵdaıǵa tolyq jaýap beremiz. Munda quqyq qorǵaý organdary men prokýratýranyń qatysýymen komıssııa qurylatyny sózsiz. Olar bárin muqııat qarastyrady. Buǵan biz de múddelimiz», - dedi Aleksandr Klebanov.
Pavlodar oblysy ákiminiń m.a. Ábilqaıyr Sqaqovtyń málimetinshe, qazirgi kezdegi basty mindet – úılerdi jylýmen jabdyqtaýdy qalpyna keltirý.
«Bári problemany tolyqtaı túsinip otyr, naqty sheshimder qabyldaý qajet. Biz osy maqsat úshin jınaldyq. Negizgi mindet – tez arada jylýmen jabdyqtaý júıesin qalpyna keltirý. Biz barlyq kúsh pen resýrstardy qoldanamyz. Sondyqtan bárimiz qaladaǵy jylýmen jabdyqtaý júıesi shtattyq rejımde iske qosylmaıynsha, bul jerden ketpeımiz. Turǵyndar bizden tek osyny kútedi», - dep atap ótti Ábilqaıyr Sqaqov.
Eske salsaq búgingi saǵat 15.30-daǵy jaǵdaı boıynsha 18 kópqabatty turǵyn úı jáne 3 áleýmettik nysan jylýmen qamtamasyz etilmeı otyrdy.27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.
Keıinirek jylý qazandyǵynyń isten shyǵýyna baılanysty oblys ákimi bastaǵan jedel shtab quryldy.
Búgin Ekibastuz qalasynyń oqýshylary onlaın oqıtyny habarlandy. Qala ákiminiń aıtýynsha, 3 shaǵynaýdanǵa áli jylý berilgen joq.
28 qarasha tańerteń qalada jergilikti aýqymdaǵy tótenshe jaǵdaı jarııalandy.
Jalpy aıta ketsek, Ekibastuz qalasy boıynsha jalpy 422,5 km jylý jelileri bar. «Ekibastuzteploenergo» JShS balansynda 342,3 km, olardyń tozý deńgeıi 91% quraıdy.Ekibastuz JEO–da 10 qazandyq ornalasqan, onyń ishinde 5 energetıkalyq, 5 sý jylytý qazandyǵy. Ekibastuz qalasynda 689 kóppáterli úı jáne ortalyq jylýmen jabdyqtaýǵa qosylǵan 4 395 jeke úı bar.