Ekibastuzdaǵy 26 kópqabatty úıden shaǵymdar áli túsýde – ákim túsinik berdi

EKІBASTUZ. QazAqparat – Pavlodar oblysynyń ákimdiginde ótken apparat jıynynda Ekibastuz qalasynyń ákimi Aıan Beısekın jylý jelilerindegi aqaýlar qashan joıylatynyn aıtty, dep habarlaıdy QazAqparat Pavlodarnews-ke silteme jasap.

«20 qańtar, saǵat 10:00-degi jaǵdaı boıynsha JEO-da 6 qazandyq jumys istep tur. 4 qazandyqta aǵymdaǵy jóndeý júrgizilýde. №6 qazandyqta jumysty búgingi kúnniń sońynda aıaqtaýdy josparlap otyrmyz. №11 qazandyqta erteń keshke aıaqtalady. Al №7 qazandyqta keńeıtilgen aǵymdaǵy jóndeý júrgizilýde. Bul jumystar naýryz aıyna deıin kózdelip otyr», – dedi Aıan Beısekın.

Qala basshysynyń aıtýynsha, jyl basynan jylý jelilerinde 154 aqaý anyqtalǵan. Búginde 131 zaqym joıyldy, 23-i boıynsha jumys jalǵasyp jatyr.
«Osy 23 aqaý boıynsha jóndeý jumystaryn 10 kún ishinde aıaqtaımyz dep otyrmyz. Biraq jylý jelileri eskirgendikten kúndelikti aqaýlar anyqtalyp jatyr. Sondyqtan jumystar jalǵasatyn bolady», – dedi Aıan Beksekın.

Aıta ketsek, Ekibastuzdaǵy kóppáterli 26 úıden shaǵymdar áli kelip túsýde. Úılerdiń mekenjaılary anyqtalǵan. 13 úıde komıssııalyq zertteý tolyq júrgizildi.

«Negizinen úılerdiń jylytylmaý sebebi – úı ishindegi jylýmen jabdyqtaý jelilerine baılanysty. Sondyqtan PIK-termen birge sheshý joldaryn anyqtap jatyrmyz», – dedi qala ákimi.

20 qańtar kúni qalada 7 ýchaskede jóndeý jumystary josparlanǵan. Osyǵan baılanysty 191 jeke turǵyn úı, kópqabatty 2 úı, 1 zańdy mekeme búgin keshki saǵat 18.00-ge deıin jylýdan ajyratylǵan.