Ekibastuzda «Zoloto Rossıı» býtıgin tonaǵandar quryqtaldy
ASTANA. QazAqparat - Ekibastuzda tártip saqshylary tal túste «Maxi Mall» saýda úıindegi «Zoloto Rossıı» býtıgin tonap ketkenderdi qolǵa túsirdi, dep habarlaıdy pavlodarnews.kz.
Eske sala keteıik, 24-27 jas aralyǵyndaǵy belgisiz úsh adam ashyq túrde quny 800 myń teńgeden asatyn altyn buıymdardy qoldy qylǵan.
Ekibastuz ishki ister bólimi qylmystyq izdeý bólimshesiniń bastyǵy Áset Qaıyrjanov 24 naýryz kúni 2017 jyly qalanyń shaǵyn aýdandarynyń birinde urylardyń biri ustalǵanyn atap ótti. Ol 22 jasta, Qaraǵandy oblysy Qarqaraly aýdanynyń týmasy. Senbi kúni Qarqaralynyń tártip saqshylary qylmystyq toptyń taǵy bir 27 jastaǵy múshesin quryqtap, Ekibastuzǵa jetkizgen. Olardyń ekeýi de buǵan deıin osyndaı qylmys úshin sotty bolǵan.
«Úshinshi qaraqshy Buqar jyraý aýdanynan, - deıdi Áset Qaıyrjanov. - Qazirgi tańda ol Qaraǵandyda jasyrynyp otyr. Degenmen ony qolǵa túsirý úshin arnaıy sharalar júrgizilýde. Olardyń bergen jaýaptaryna súıensek, urlanǵan dúnıe Pavlodardaǵy lombardtardyń birine tapsyrylǵan. Iesine qaıtarylatyn altyn buıymdardy alý úshin birinshi tonaýshy qaraýylmen oblys ortalyǵyna jetkizilgen. Tergeý amaldary júrgizilýde».
Polıtsııa podpolkovnıginiń aıtýynsha, kúdiktilerdi izdestirý barysynda baqylaý kameralary tekserilgen. Nátıjesinde tártip saqshylary tonaýshylardyń ekibastuzdyqtarmen qalaı amandasyp jatqanyn kórip qalǵan. Keıin jigit ustalyp, jaýap alynǵan. Ol qylmyskerlermen dámhanada tanysyp, olardyń baılanys telefondaryn alǵan.
