Ekibastuzda jylytý júıesin jóndeý jumysy áli jalǵasyp jatyr
Oblys ákimi Asaıyn Baıhanov jóndelip jatqan ýchaskelerdi aralap, jumys barysymen tanysty.
Moldaǵulova kóshesi boıynda «Shahter» stadıonynyń janynda zaqymdaný qaýpiniń joǵary bolýyna baılanysty uzyndyǵy 50 metr tozǵan jelini aýystyrýǵa daıyndyq júrip jatyr.
M. Júsip kóshesi, 52/1 ýchaskesinde buryn jylý jelisi aýystyrylǵan, qazir sol jerde jabyn plıtalaryn montajdaý jáne topyraqty toltyrý jumysy júrgizilip jatyr.
Shákárim kóshesi men Abaı kóshesiniń qıylysynda mamandar uzyndyǵy 340 metr bolatyn TM-5 jylý jelisin irilendirip qurastyrady.
Jóndeý jumysy aıaqtalǵan ýchaskelerdi qalpyna keltirý isi jalǵasyp jatyr. Osyndaı 40 ýchaskeniń 29-y qalpyna keldi.
Temirbeton naýalaryn ornatý qajet bolǵan 11 ýchaskedegi jumys kelesi aptanyń sońyna deıin aıaqtalady.
Kenshiler qalasyn jylýmen jabdyqtaý jónindegi jedel shtab otyrysynda Asaıyn Baıhanov Ekibastuz qalasynyń ákimi Aıan Beısekınniń, Ekibastuz JEO dırektory Dmıtrıı Zaharovtyń jáne «Pavlodarenergo» AQ bas dırektory Vladımır Lesınniń baıandamalaryn tyńdady.
Ótken otyrysta oblys basshysy jylýmen jabdyqtaý qyzmetiniń aqysyn qaıta esepteýdi tapsyrǵan edi.
Vladımır Lesınniń aıtýynsha, «Ekibastuzjylýenergııasy» JShS esep bólimi tıisti esepti júrgizip, kelesi aptanyń basynda JEO mamandary halyq úshin qaıta esepteý algorıtmin usynýǵa ýáde berdi.
Sondaı-aq, turǵyn úılerdiń kireberisinde jylytýdy qalpyna keltirý úshin radıator ornatý máselesi pysyqtalyp jatyr. Bul týraly turǵyndardan ótinish kóptep túsip jatyr.
Búgingi tańda osyndaı 287 ótinish kelip tústi.
Radıator jetkilikti ári olar usynylǵan ótinimge sáıkes kelesi aptanyń basynan bastap usynylady.
Asaıyn Baıhanov jylytý maýsymy aıaqtalǵannan keıin jóndeý naýqanyna daıyndyq jumystaryn erekshe baqylaýda ustaýdy tapsyrdy.
Óńir basshysy qazirdiń ózinde qajetti materıaldyń 70%-yn satyp alýdy bastap, jumys kestesin anyqtaý qajet ekenin atap ótti.
Foto: Valerıı Býgaev