Ekibastuzda jyl basynan beri 50 vagon shyǵaryldy
ASTANA. QazAqparat - Uzaq ýaqyt toqyrap turǵan «Qazaqstan vagon qurastyrý kompanııasy» qaıtadan óz jumysyn qolǵa aldy. Jyl sońyna deıin kásiporyn 1650 vagon shyǵarýdy josparlap otyr, dep habarlaıdy pavlodarnews.kz.
Kompanııa 2017 jyldyń qarashasynda qyzmetine kirisken. Ótken jyly 88 vagon shyǵarǵan bolsa, 2018 jyldyń úsh aptasynda 44 vagon qurastyryp úlgergen. Qazirgi kúni kompanııa «QazTemirTrans» AQ-nyń aýqymdy tapsyrysyn oryndaýda.
«2017 jyly júk vagondaryn qurastyrýdy qarjylandyrý úshin Ulttyq qordan «BRK Lızıng» AQ arqyly «QazTemirTrans» AQ 15 mıllıard teńge bólgen bolatyn, - dep habarlady oblystyq ındýstrıaldy-ınnovatsııalyq damý basqarmasy. - Lızıng alynǵannan keıin «QazTemirTrans» AQ 1300 jarty vagonǵa jáne 270 platforma-vagonyna tapsyrys bergen. Tapsyrysty oryndaý merzimi - 2018 jyldyń shildesine deıin».
Sonymen qatar, Ekibastuzda temir jol dóńgelekterin qurastyratyn keshenniń qurylysy aıaqtalýda. Joǵary tehnologııalyq ımporttyń ornyn basýǵa baǵyttalǵan óndiris jobasy «Prommashkomplekt» JShS bazasynda júzege asýda. Jobanyń jalpy somasy 54 mıllıard teńgeden astam. Qýattylyǵy jylyna 200 myń dóńgelek shyǵarýǵa jetedi. Qazirgi ýaqytta óndiristiń korpýsy salynyp, negizgi qurylǵylar ornatylǵan.
