Ekibastuzda júkti áıel mektep oqýshylaryn tonaǵan
PAVLODAR. QazAqparat - Pavlodar oblysynda polıtsııa qyzmetkerleri eki jas áıeldi ustady, olar kámeletke tolmaǵan balalardy tonaýmen aınalysyp júrgen, dep habarlaıdy QazAqparat.
Ekibastuzdyń tártip saqshylary qalanyń 22-24 jas aralyǵyndaǵy esh jerde jumys istemeıtin eki turǵynyn ustady. Olar kámeletke tolmaǵan balalardy tonaýmen aınalysyp kelgen, dep habarlaıdy Pavlodar oblystyq Іshki ister departamentiniń baspasóz qyzmeti.
Kúdiktilerdiń biriniń aıaǵy aýyr, al ekinshisi eki jasar bala tárbıelep otyr. Qaskóıler balalarǵa kelip, olarǵa dóreki sóılep, «Nemenege qarap tursyń?», «Nemenege kúlesiń?» degen sózder arqyly psıhologııalyq qysym kórsetip, qorqytyp, ábden úreılengen oqýshylardyń altyn áshekeıleri men qaltaly telefondaryn tartyp alǵan.
Balalardan tartyp alynǵan zattardy olar birden lombardqa ótkizip, telefondardy satyp jiberip júrgen. Úsh kún ishinde qaraqshylardan 3 kámeletke tolmaǵan jasóspirim zardap shekken. Olardyń úsheýi de bastaýysh synyp oqýshylary. Tonaý áreketteri boıynsha sotqa deıingi tergeý amaldary júrip jatyr. Qylmys jasady dep kúdik keltirilip otyrǵandar qamaýǵa alyndy.
