Ekibastuzda jóndeýge baılanysty ajyratylǵan 48 jer úıge áli jylý berilgen joq

EKІBASTUZ. QazAqparat – Ekibastuzda búgin ýaqytsha jylýdan ajyratylǵan kópqabatty turǵyn úıler men eki áleýmettik nysanǵa qaıta jylý berildi. Bul týraly QazAqparat tilshisi qala ákimdiginiń áleýmettik jelidegi resmı paraqshasyna silteme jasap habarlaıdy.

«15 qańtar kúni saǵat 13:30-da 4L jylý kamerasynan M. Júsip kóshesi 124 meken jaıyna qaraı bekitý armatýrasyn qosý boıynsha jóndeý jumystary aıaqtaldy. Oǵan 8 jumysshy 1 mamandandyrylǵan tehnıka jumyldyryldy. Qazirgi ýaqytta buǵan deıin ýaqytsha jylýdan ajyratylǵan nysandar (20 kópqabatty turǵyn úı, 106 jeke turǵyn úı, 14 zańdy tulǵa jáne 2 áleýmettik nysan) jylýǵa qosyldy. Qazirgi ýaqytta jylý jelisi birqalypty jumys istep tur», - delingen Ekibastuz qalasy ákimdiginiń Іnstagram paraqshasynda jarııalanǵan habarlamada.

Degenmen áli 48 jeke turǵyn úıge jylý berilgen joq. Ákimdik dereginshe, jańadan ornatylǵan jelilerge qosý jumystaryna baılanysty olar jylýdan ýaqytsha ajyratylǵan.

«15 qańtar kúni saǵat 9:00-den bastap Amangeldi kóshesinen Buqar Jyraý kóshesine deıingi ýchaskede jylý jelisin jańadan ornatylǵan jelige qaıta qosý jumystary júrgizilýde. Júrgizilip jatqan josparly jóndeý jumystaryna baılanysty 48 jeke turǵyn úı ýaqytsha jylýdan ajyratyldy», - dep málim etti ákimdikten.

Eske sala keteıik, búgin tańerteń Ekibastuzda eki áleýmettik nysan ýaqytsha jylýdan ajyratylǵan edi.