Ekibastuzda jańa oqý orny ashylady
ASTANA. QazAqparat - Jańa ǵımarat qalanyń qaq ortasynda ornalasqan. Onyń qurylysy toqtap qalǵan bolatyn. Aldaǵy ýaqytta iri kásiporyndardyń esebinen qurylys jumystaryn aıaqtaý josparlanyp otyr. Al oqytý jumystary Polsha eliniń tájirıbesi negizinde júrgiziledi, dep xabarlaıdy QazAqparat tilshisi.
"Negizi, ol ǵımarattyń qurylysy 2008 jyly bastalǵan. Biraq artynan toqtap qaldy. Men ózim ol kezde ákim bolǵan joqpyn. Shyny kerek, qurylysqa biraz aqsha salyndy. Endi, ony aıaqtap, iske qosý qajet. Qazir qurylysty qalpyna keltirý boıynsha jobalyq-smetalyq qujattar daıyn. Barlyǵy memlekettik saraptamaǵa jiberildi. Bizdiń josparymyzǵa sáıkes, jańa oqý ornynda aýyl sharýashylyǵy boıynsha mamandar daıarlanady", - dedi Ekibastuz qalasynyń ákimi Qaırat Núkenov Astanadaǵy Qazaqstan-Polsha bıznes forýmy aıasynda.
Ákimniń aıtýynsha, 8-9 qyrkúıek kúni Ekibastuzǵa Polsha eliniń delegatsııasy keledi degen jospar bar. Sol kezde olarǵa barlyq ǵımarattardy kórsetip, aldaǵy jumysty jan-jaqty pysyqtaý josparlanyp otyr.
Búginde jańa oqý ornynyń ǵımaratyn qalpyna keltirýge 3,2 mlrd teńge qajet. Atalǵan jumystardy jergilikti bıýdjet iri kásiporyndardyń esebinen atqarý josparlanǵan. Al Polsha aýyl sharýashylyǵy salasyndaǵy tájirıbesimen bólisedi. Tipti, qazaqstandyq mamandardy óz jerinde daıarlap, olarǵa aı saıyn stıpendııa tóleıtin bolady.
