Ekibastuzda úıdiń terezesinen qulaǵan ekinshi oqýshy kóz jumdy
EKІBASTUZ. QazAqparat - Ekibastuzda kópqabatty úıdiń terezesinen qulap ketken ekinshi oqýshy kóz jumdy, dep habarlaıdy QazAqparat pavlodarnews.kz saıtyna silteme jasap.
№ 9 orta mekteptiń 15 jastaǵy oqýshysy qaıǵyly oqıǵadan keıin bes kún ótken soń aýrýhanada kóz jumdy.
Oqıǵa 13 qyrkúıek kúni Baýyrjan Momyshuly kóshesindegi bes qabatty turǵyn úıde bolǵan edi. Jasy 15-tegi qyzdar úıdiń kireberisindegi terezeden qulap ketken. Olardyń biri aýrýhanaǵa barar jolda qaıtys bolsa, ekinshisi aýyr halde qalalyq aýrýhananyń jansaqtaý bólimine jetkizildi.
Aman qalǵan qyzǵa «ashyq bas-mı jaraqaty, bet jáne qańqa súıekteriniń, omyrtqasynyń synýy» dıagnozy qoıylǵan.
«Dárigerler onyń ómiri úshin bes kún arpalysty. Jasóspirimdi qutqarý úshin qarqyndy terapııa júrgizildi. Ókinishke oraı, qyz bala esin jımastan dúısenbi kúni saǵat keshki onda kóz jumdy», - dedi oblystyq Densaýlyq saqtaý basqarmasynyń baspasóz hatshysy Elmıra Temirǵalıeva.
Búgin sondaı-aq balalardyń bıikten qulaýyna qatysty taǵy bir oqıǵa oryn aldy. 1 Maı kóshesi, 11-úıde ata-anasymen birge qonaqta bolǵan 1,5 jasar bala besinshi qabattaǵy terezeden qulap ketken.
Elmıra Temirǵalıeva málim etkendeı, sábı ashyq bas-mı jaraqatymen aýrýhanaǵa jetkizildi.
