Ekibastuzda úsh qyzdy tonaǵan boıjetkenderge sot úkimi shyqty
ASTANA. QazAqparat - Sot kámelettik jasqa tolmaǵan úsh qyzdy tonaǵan eki boıjetkenniń árqaısysyna 3,5 jyl bas bostandyǵynan aıyrý jazasyn taǵaıyndady. Olar jas qyzdardyń altyn syrǵalaryn, qol telefondaryn tartyp alǵan, dep habarlaıdy «QazAqparat» HAA tilshisi Ekibastuz qalalyq sotynyń baspasóz qyzmetine silteme jasap.
Usynylǵan aqparatqa sáıkes, sot tonaý deregi boıynsha jıyrma eki jastaǵy Sh jáne jıyrma tórt jastaǵy K esimdi eki qyzǵa qatysty qylmystyq is qozǵady.
Іs materıaldaryna sáıkes, 2017 jyldyń sáýir aıynda sottalýshylar Gogol kóshesi boıyndaǵy úıdiń aýlasynda bolyp, balalardyń oıyn alańynan kámelettik jasqa tolmaǵan eki qyzdy baıqaǵan.
Sosyn olarǵa jaqyndap, kúsh kórsetip qorqytyp, eki dana altyn syrǵalaryn ashyq túrde kúshpen urlaý arqyly 68 myń teńge kóleminde materıaldyq shyǵyn keltirgen. Sottalýshylar sol kúni bulardan ózge A. esimdi kámelettik jasqa tolmaǵan qyzdyń Samsung Galaxy J2 markaly uıaly telefonyn da tartyp alǵan. Jábirlenýshige 54,69 myń teńge kóleminde materıaldyq shyǵyn keltirdi.
Sot aldynda sottalýshylar isterine ókinetindigin bildirdi. Sot Sh jáne K esimdi azamatshalardy QR Qylmystyq kodeksiniń 191-baby 2-bólim 1,2,3-tarmaqtary boıynsha kináli dep tanydy. Olardyń buǵan deıin isti bolmaǵandyǵyn, oń minezdemesin, istegen isterin moıyndap, ókinetindigin jáne jábirlenýshiler shyǵynyn ótegendigi men sottalýshylardyń júktiligin eskere otyryp, olardyń árqaısysyna 3 jyl 6 aı bas bostandyǵynan aıyrý jazasy taǵaıyndady. Úkim zańdyq kúshine áli engen joq.
