Ekibastuzda ýaqytty úsh ese únemdeıtin ekoagrorobot qurastyryldy
Bul týraly oblystyq bilim berý basqarmasynan málim etti. Fızıka pániniń muǵalimi Mansur Kalıevtiń jetekshiligimen qolǵa alynǵan jobanyń maqsaty - aýyl sharýashylyǵynda robottardyń paıdasy men mańyzyn arttyrý. Ekoagrorobot ekonomıkalyq ári ekologııalyq jaǵynan únemdiligimen erekshelenedi.
«Ekoagrorobot birneshe jumysty birden isteı alady, jerdi jyrtady, egedi, kedergi zattardy alyp tastaıdy, kran arqyly dándi tasymaldaıdy. Shynjyr taban tárizdes dońǵalaqtary sýly jerlerden ótýge kómektesedi. Bul robottyń modelin LEGO Mindstorms Education EV3 konstrýktorlyq jıyntyǵy arqyly qurastyrdyq. Alǵashqyda qarapaıym qurastyrylǵan robotqa birneshe fýnktsııany iske qostyq»,- deıdi Temirlan Baıgojın.
Ekoagrobottyń aýyl sharýashylyǵyndaǵy rólin tolyq zerttegen oqýshylar óz jumystaryn oblystyq ǵylymı jobalar saıysynda sátti qorǵap, sertıfıkatqa ıe bolǵan. Temirlan Baıgojın «Uly ónertapqyshtyqqa alǵashqy qadam» atty oblystyq saıysta júldeli ІІІ oryndy qanjyǵasyna baılady.
«Bul robot kóp fýnktsıonaldy, ıaǵnı agronomdar kóptegen tehnıkaǵa, otynǵa qarajat jumsamaıdy, - deıdi Hammet Qajymurat. «Sonymen qatar óziniń ýaqytyn, energııasyn, shyǵyndardy únemdeı alady. Ekologııalyq jaǵynan qorshaǵan ortaǵa eshqandaı zııan keltirmeıdi. Ekoagrorobot Stırlıng qozǵaltqyshynyń kómegimen jumys isteıdi. Stırlıng qozǵaltqyshynyń jumysy temperatýranyń aıyrmashylyǵy arqyly júzege asady».
Aıta keterligi, qalaǵa arnaıy kelgen QR Ulttyq ekonomıka mınıstri Tımýr Súleımenovtiń aldynda tanystyrǵan kezde mınıstr jumystyń jańashyldyǵyna qyzyǵýshylyq tanytyp, bolashaqta bul jobaǵa grant bólý jóninde usynys aıtqan.