Ekibastuzda tuńǵysh «Túlekter alleıasyna» 128 shyrsha otyrǵyzyldy
ASTANA. QazAqparat - Ekibastuz qalasyndaǵy «Shahter» mádenıet jáne demalys saıabaǵynda sońǵy qońyraýǵa qatysqan mektep bitirýshiler «Túlekter alleıasy - 2018» aýmaǵyna óz aǵashtaryn otyrǵyzdy, dep habarlaıdy pavlodarnews.kz.
Saıabaqtaǵy sońǵy qońyraý sharasyna ár mektepten alty túlek qatysty.
- Mektepte «Túlekter alleıasynyń» ashylýynda aǵash otyrǵyzý týraly usynys bildirdi. Men birden kelisim berdim. Qala ákimimen birge aǵash otyrǵyzý - úlken abyroı. Bul alleıanyń bizderge arnalǵany óte qatty qýantady, - deıdi bolashaq ınjener Aıda Talǵat.
Óz kezeginde qala ákimi Qaırat Núkenov túlekterdi sońǵy qońyraý kúnimen quttyqtady.
- Búgin alǵash ret «Shahter» saıabaǵynda bıylǵy túlekterdiń arqasynda jańa jaqsy dástúr bastaý aldy, - deıdi shahar basshysy. - Alleıa sizderdiń belsendi azamattyq ustanymdaryńyzdyń jarqyn kórinisi.
Aǵash otyrǵyzǵanda armandaryńdy aıtyńdar, olardyń oryndalýyna tilektespin. Aıta keteıik, alleıa Astananyń 20 jyldyǵy, Pavlodar oblysynyń 80 jyldyǵy jáne «Rýhanı jańǵyrý» baǵdarlamasy sheńberinde ashyldy.
Jańa demalys ornyna 128 shyrsha otyrǵyzyldy. Jýyq arada saıabaqta taǵy da 600 aǵash paıda bolady. Bıylǵy jyly Ekibastuz qalasynda 623 túlek mektep bitirdi.
