Ekibastuzda toq soqqan erli-zaıyptylar kóz jumdy
- 13 aqpanda «112» jelisine jylý radıatorlarynyń zaqymdanýynan turǵyn úıdi sý basyp jatqany týraly habar tústi. Oqıǵa ornynda jeke turǵyn úıden 1959 jyly týǵan er adam men 1965 jyly týǵan áıeldiń máıiti tabyldy. Denelerinde zorlyq-zombylyq belgileri joq, - dep málimdedi Pavlodar oblysynyń polıtsııa departamentiniń baspasóz qyzmeti.
Tekserý kezinde mamandar úıdiń qonaq bólmesinde edende jalańash symdary bar elektr jylytqyshty baıqaǵan.
- Sot-medıtsınalyq sarapshylarynyń aldyn ala qorytyndysyna sáıkes, ólimge tehnıkalyq elektr togynyń soǵýy sebep bolǵan. Sot-medıtsınalyq saraptama taǵaıyndaldy, onyń qorytyndysy boıynsha protsessýaldyq sheshim qabyldanady, - dep qosty polıtseıler.
«Pavlodarenergo» AQ málimetinshe, apat jeke úıishilik jelilerde bolǵan.
31 qańtarda «Ekibastuzjylýenergo» JShS-ne úı ıesinen ilmekti armatýralardy aýystyrý úshin jylý jelisin óshirý týraly ótinish túsken.
Jylý maýsymy kezinde jeliler tek jylý qyzmetkerleriniń baqylaýymen jáne ótinish berýshide qajetti materıaldar daıyn bolǵan kezde ǵana óshiriletindikten kelesi kúni mamandar atalǵan mekenjaıǵa kelgen.
- Alaıda, ornatýǵa josparlanǵan armatýra talap etiletin standarttarǵa sáıkes kelmegendikten, qońyraý shalǵan kúni jylýdy óshirý júrgizilgen joq. Mamandar jóndeý jumystaryna qajetti qural-jabdyqtardy daıyndaý boıynsha usynystar berdi. Erli-zaıyptylardan qaıtadan ótinishter bolǵan joq, osyǵan baılanysty jylý jelileriniń mamandary bul mekenjaıǵa qaıta barmaǵan, - dedi «Pavlodarenergo» AQ.
Energetıkalyq kompanııa jeke turǵyn úılerdiń ishki jelilerin jóndeý jumystary Ekibastuz jylý jelileri kásipornynyń jaýapkershiligine jatpaıtynyn atap ótti.
Sondaı-aq munda marqumdar tabylǵan kúni turǵyn úı ınspektsııasy men polıtseılerdiń ótinishi boıynsha osy mekenjaıǵa úıdegi sýdy sorý úshin sý sorǵyzý kóligi jiberilgeni habarlandy.