Ekibastuzda taratylǵan elektr jylytqyshtar turǵyndardyń menshiginde qalady
«Ekibastuzdaǵy apattan biraz adam zardap shekti. Myńnan astam aryz-shaǵym tústi, adamdar qandaı qıyndyqqa tap bolǵanyn jazyp jatyr. Barlyq shyǵyndy kompanııa qaıta tóleıdi, eshkimniń qaltasynan shyǵyn shyqpaıdy», - dedi Serik Jumanǵarın Ekibastuzda ótken baspasóz konferentsııasynda.
Sonymen birge, tilshiler spıkerge qaladaǵy elektr jylytqyshtary qymbattap ketkenin jetkizdi.
«Maǵan berilgen derekterge sáıkes, 5 myń elektr jylytqysh qala turǵyndaryna tegin taratylǵan. Ony berip jatqan – kompanııa ıeleri, Amanat partııasy jáne volonterler. Olardy keri qaıtarýdyń qajeti joq, turǵyndardyń óz menshiginde qalady. Árıne, suranys kóbeıgende baǵa da ósedi. Degenmen, 5 myńnan astam jylytqysh qalaǵa jetkilikti, satyp alýǵa qajettilik joq. Tegin berip jatyrmyz», - dedi Premer-Mınıstr orynbasary.
Buǵan deıin Serik Jumanǵarın keshke deıin barlyq kópqabatty úıge jylý beriletinin aıtqan edi.
Esterińizge sala ketsek, 27 qarasha kúni saǵat 1:20 shamasynda Ekibastuz JEO-da qazandyq isten shyǵyp, on mınýttan keıin taǵy úsheýi toqtaǵan bolatyn.
Búgin saǵat 8:00-de ótken Ekibastuzdaǵy tótenshe jaǵdaıdy joıý jónindegi jedel shtabtyń otyrysynda qalanyń jylý jelilerindegi qazirgi jaǵdaı men temperatýralyq rejımdi qalpyna keltirý boıynsha qabyldanyp jatqan sharalar talqylandy.
