Ekibastuzda Soltan qoja kesenesi ashyldy
ASTANA. QazAqparat - Ekibastuz aımaǵyndaǵy Qyldykól shatqalynda Isabek ıshan tarıhı-mádenı keshenindegi qurylysy aıaqtalǵan Soltan qoja kesenesinde Qurban aıttyń alǵashqy kúni as berildi, dep habarlaıdy pavlodarnews.kz.
Keshenniń tusaýkeseri bıyl Soltan qojanyń týylǵanyna 120 jáne ózinen soń taıaǵyna ıe bop, din-aǵartý isin jalǵastyrǵan Isabek ıshan shóberesi Jandarbek qoja Qojahmetulynyń týylǵanyna 110 jyl tolýyna oraılastyryldy.
Aıta keterligi, el ishinde «Atam basy» atalyp ketken qorymda Ertis-Baıan óńirine ıslam dinin taratýda elge eńbegi sińgen din qaıratkeri Isabek ıshan jáne onyń dinı-aǵartýshylyq qyzmetin jalǵastyrǵan urpaqtary máńgilik meken tapqan. Sonyń ishinde halyq arasynda Soltan qoja atalǵan, Isabek ıshannyń nemeresi Muhamedsoltan Nurmuhanbetulynyń da zıraty bar. Muhamedsoltan Nurmuhanbetuly 1896- 962 j.j. aralyǵynda ómir súrgen. Jas kúninde Ýfa qalasynda dinı bilim alǵan. Ol dinge tyıym salynǵan keńes dáýiri tusynda ómir súrgenine qaramastan, ımandylyq jolynda halyqqa qyzmet etip, ádildigi, aqyl-parasaty, aldaǵyny boljaı bilgen erekshe qasıetimen elge qadiri artqan tulǵa bolǵan. Bul kúni «Uly dala tulǵalary» taqyrybynda ótken rýhanı-tanymdyq sharaǵa aımaq basshysy Bolat Baqaýov, oblysymyzdyń qurmetti azamattary, belgili óner qaıratkerleri, din ókilderi qatysty.
