Ekibastuzda Shahter kúni toılandy
PAVLODAR. QazAqparat - Ertis óńiriniń kenshileri kásibı merekeleriniń qarsańynda ótken jylǵydan 5,5 paıyz artyq kómir óndirip, 30,8 mıllıon tonnadan asyrdy, dep habarlaıdy, pavlodarnews.kz.
Shahter kúnine oraı qaladaǵy mádenıet ortalyǵynda saltanatty kezdesý ótti. Kezdesý qonaqtary ken oryndarynda jumys jasaıtyn júzdegen kenshiler boldy. Olardyń arasynda «Shyǵys» kenishinde 30 jyldan astam ýaqyt eńbek etip kele jatqan Rıshat Ámirenov te bar. - Osy jyldar aralyǵynda otbasymyzda kenshiler áýleti qalyptasyp úlgerdi. Menimen birge eki ulym, eki qyzym men eki kúıeý balam jumys jasaıdy. Árqaısymyz úshin Shahter kúni jyldaǵy basty merekelerdiń biri bolyp sanalady,- dedi Rıshat Ámirenov.
Kenshilerdi kásibı merekelerimen oblys ákimi Bolat Baqaýov ta quttyqtady. Ol óńir kómir boıynsha elimizdiń ishki ekonomıkadaǵy qajettilikterin tolyq qamtamasyz etýmen qatar, eksporttyń da joǵary deńgeıine ıe ekenin atap ótti. - Sizderdiń mamandyqtaryńyz aımaǵymyz úshin qashan da qajetti ári mańyzdy bolyp keldi jáne solaı qala beredi, - dedi mereke sebepkerlerine Bolat Baqaýov. - Shahterlerdiń eńbeginiń arqasynda óndiris oryndary men tasymal jumys jasap, al, úıimizge jylý kelip tur. Kenshiler jan aıamaı eńbek etý arqyly Ekibastuzdyń kómir kásipornynyń shejiresine óz esimderin jazýda. Sizderdiń dańqty eńbekterińiz bar yntamen berilýdiń jáne ıgiliktiń úlgisi bolyp qalady. Batyldyq, kúsh jáne jigerlilik - shahter mamandyǵyn tańdaǵan adamdardyń ózgelerden aıyrmashylyǵy».
Shahter kúnine oraı kómir óndirisinde kózge túsken qyzmetkerlerge alǵys hattar men qurmet gramotalary tabystaldy. Shara merekelik kontsertpen aıaqtaldy.
