Ekibastuzda saýda úıi otqa orandy, segiz dúńgirshek tolyǵymen joıyldy
ASTANA. 19 sáýir. QazAqparat - Beısenbi kúni tańerteń Pavlodar oblysynyń Ekibastuz qalasynda «Sáýle» saýda úıinde órt bolyp, jalyn 120 sharshy metr aýmaqty sharpydy.
Bul týraly QR TJM-nen habarlady.
Órt saldarynan halyq tutynatyn taýarlary bar 8 dúńgirshek kúlge aınaldy, taǵy beseýi jarym-jartylaı zaqymdandy. Abyroı bolǵanda, zardap shekken jandar joq. Tilsiz jaý 1,5 saǵattan keıin aýyzdyqtaldy. Oǵan QR TJM Pavlodar oblystyq TJD órt sóndirý qyzmetiniń 27 adamy men 4 tehnıkasy jumyldyryldy.
Sondaı-aq, Batys Qazaqstan oblysynyń Derkól eldimekeninde beısenbi kúniń tańǵy saǵat tórtte saıajaılyq úıdiń 48 sharshy metr aýmaǵyn jalyn sharpydy. Órt 2,5 saǵattan keıin sóndirildi. Ony aýyzdyqtaýmen QR TJM BQO TJD órt sóndirý qyzmetiniń 6 mamany men 2 tehnıkasy aınalysty. Oqıǵa ornynan 29 jastaǵy áıeldiń múrdesi tabyldy. 40 jastaǵy er adam túrli deńgeıdegi kúıik jaraqattarmen aýrýhanaǵa jetkizildi.
