Ekibastuzda sapasyz berilgen jylý aqysyn qaıta esepteý qajet - Asaıyn Baıhanov
Bul turǵyda ákim áleýmettik jelidegi paraqshasynda JEO-nyń jabdyqtary men kommýnıkatsııalary qalaı jóndelip jatqanyn teksergenin jazdy.
Óńir basshysy qala turǵyndary jylý berý júıesiniń sapasyna qatysty shaǵym túsirip jatqanyn aıtty. Osy oraıda, A. Baıhanov jylýmen jabdyqtaý salasyndaǵy sapasyz qyzmet úshin tólemdi qaıta esepteý boıynsha usynylǵan jańa tártippen kelispeıtinin, sondaı-aq oǵan turǵyndar da narazy ekenin jetkizdi. Shyn máninde, bul qyzmet tıisti deńgeıde júzege asyrylmady. Sondyqtan, osy esep-qısap jumystaryn qaıta qaraý kerek.
Jıyn barasynda stantsııa 6 qazandyqtyń jumysyn qamtamasyz etip otyrǵany aıtyldy. Jylý berý jelileri boıyndaǵy 9 jerde qalpyna keltirý jumystary jalǵasyp jatyr. Kelesi aptada temirbeton qurylystaryn ornatý, eń kúrdeli ýchaskelerde qubyrlardyń betin jabý sııaqty jumystar atqarylmaq.
«Jylý elektr ortalyǵyn jóndeýge qatysty daıyndyq bastaldy. Kóktemde stantsııada 5 sý jylytý jáne 3 energetıkalyq qazandyq agregaty jańartylady. Qazir jobalaý-smetalyq qujattama ázirlenip jatyr. Negizgi mindet – qaladaǵy jylýmen qamtamasyz etý júıesiniń qaıtadan toqtap qalýyna jol bermeý. Sondyqtan, ony barynsha tezirek qalpyna keltirýge mán berilip otyr», - dedi Asaıyn Baıhanov.
Eske salsaq, 27 qarashada Ekibastuz jylý elektr ortalyǵynda apat bolyp, qala turǵyndary jylýsyz qalǵan edi.
28 qarasha kúni tańerteń qalada jergilikti aýqymdaǵy tótenshe jaǵdaı jarııalandy.
Jaqynda «Ekibastuzjylýenergo» JShS-ǵa 1,1 mln teńgege aıyppul salyndy.
Foto: Pavlodar oblysy ákiminiń baspasóz qyzmeti
