Ekibastuzda probatsııa baqylaýynan jasyrynyp, qashyp júrgen sottalýshy tabyldy
PAVLODAR. QazAqparat. - Er adam sottalyp, probatsııalyq baqylaýda bolǵan. Ol úısizderge arnalǵan ortalyqqa ornalastyrylǵan, alaıda tártip buzǵany úshin shyǵarylǵan. Sóıtip ol baqylaýdan jasyrynyp qalǵan. Ony metall qabyldaý pýnktinen taýyp aldy, dep habarlaıdy QazAqparat.
«Densaýlyqqa aýyr zııan keltirgeni úshin sottalǵan adam Ekibastuzda izdestirýden keıin tabyldy», - dep habarlady Pavlodar oblysy boıynsha qylmystyq-atqarý júıesi departamentiniń baspasóz qyzmeti.
Onda krımınaldyq polıtsııa bóliminiń qyzmetkerleri Ekibastuz qalasynyń probatsııa qyzmetiniń ınspektorlarymen birge metall qabyldaý pýnktileriniń birinde 36 jastaǵy sottalýshyny ustaǵanyn aıtty.
Probatsııalyq baqylaýdaǵy adamnyń densaýlyqqa aýyr zııan keltirgeni úshin bes jarym jylǵa bas bostandyǵy shektelgen.
«Esepke qoıý kezinde sottalýshynyń turǵylyqty jeriniń joqtyǵy anyqtaldy jáne probatsııa qyzmetiniń ótinishi boıynsha ol qıyn ómirlik jaǵdaıǵa tap bolǵan adamdarǵa arnalǵan ýaqytsha beıimdeý ortalyǵyna jiberildi. Munda sottalýshy bir jyldaı turǵan. Іshki tártipti buzǵany úshin osy ortalyqtan shyǵarylyp, probatsııalyq baqylaýdan jasyrynǵan. Sol sebepti izdeý jarııalandy», - dep túsindirdi Ekibastuz probatsııa qyzmetiniń bastyǵy Darhan Medetov.
Sottalýshynyń aıtýynsha, ol turǵylyqty mekeni bolmaǵan soń Ekibastuz qalasynyń ár jerinde kúneltip, ishimdikke salynǵan.
Er adam Ekibastuz polıtsııa basqarmasynyń ýaqytsha ustaý ızolıatoryna qamaldy.
«Sottalýshyǵa qatysty materıal probatsııalyq baqylaýdan jasyrynyp, jaltarǵany úshin bas bostandyǵyn shekteýdi bas bostandyǵynan aıyrýǵa aýystyrý týraly máseleni qarastyrý úshin qalalyq sotqa jiberiledi», dep habarlady oblystyń q ylmystyq-atqarý júıesi departamenti.
