Ekibastuzda paıdalanýǵa berilmegen oqý ortalyǵy tonalyp jatyr
PAVLODAR. QazAqparat - Ekibastuzdaǵy otyn-energetıka salasyna mamandar daıyndaıtyn óńirlik ortalyqtyń qurylysy aıaqtalmaǵan ǵımaratyn belgisiz bireýler bólshektep jatyr, dep habarlaıdy «QazAqparat» HAA tilshisi.
«Terezeleri ornynda turǵan edi. Qashan urlap ketkenin bilmeımin. Túnde áketken shyǵar», - deıdi nysannyń kúzetshisi Evgenıı Rybakov. Ol paıdalanýǵa berilmegen ortalyq ǵımaratyn birneshe jyldan beri qaraýyldap keledi.
Onyń sózine qaraǵanda, buryn kúzetshiler úsheý bolǵan, sol kezde tóńirekti baqylaýǵa bolatyn edi. Biraq nysannyń bıýdjetin qysqartty, endi qazir olar jumysqa bir-birden shyǵyp júr. Sondyqtan ortalyqty túgel qaraýyldaý múmkin emes.
«Túnde júrýge qorqasyń. Qolshammen júrýdiń paıdasy joq. Urylar jaryqty kórse qashyp ketedi. Korpýstardyń ishine kirmeımiz. Ǵımarattyń ishinde kim turǵanyn, qolynda ne baryn bilmeımiz ǵoı. Óltirip, bir jerge kómip ketedi», - deıdi E. Rybakov.
Nysandy salýdy Qazaqstan Bilim jáne ǵylym mınıstrligi bastaǵan. Qurylys jumystary on jyldaı buryn toqtatylǵan. BǴM odan bas tartqan. Barlyǵy 16 korpýs salynǵan. O basta oqý ortalyǵyn 2008 jyly ashý josparlanǵan bolatyn. Alaıda ony paıdalanýǵa berý merzimi birneshe ret keıinge shegerildi.
Nysan qurylysyna tórt jarym mıllıard teńgeden astam qarjy quıylǵan. Biraq jer batpaqty bolǵandyqtan, ǵımarattardyń tómengi qabatyn sý basyp, irgetasynyń bir bóligine zaqym kelgen. Qatty jel shatyryn ushyryp áketken, qabyrǵalary jarylǵan. Ortalyqtyń kireberisteri kúl-qoqyspen tolǵan.
Ekibastuzdyń ákimshiligi oqý korpýstary men jataqhanaǵa arnalǵan ǵımarattardy óz qajetine paıdalanýdy josparlap otyr. Ǵımarattardyń dál qaısysy jaramdy ekendigi tolyq belgili emes. Ákimdiktegiler oqý ortalyǵyn jóndeý jáne qalpyna keltirý úshin taǵy tórt mıllıard teńge qajet ekenin aıtady. Biraq jumysty bastaýdan buryn joba-smetalyq qujattardy túzetý qajet, al odan buryn saraptama júrgizý kerek.
