Ekibastuzda otyn-energetıka keshenine kadr daıarlaıtyn ortalyq ashyldy
EKІBASTUZ. QazAqparat - Ekibastuzda otyn-energetıka keshenine kadr daıarlaıtyn óńiraralyq ortalyq ashyldy. Oqý ordasynyń ashylý rásimine Pavlodar oblysynyń ákimi Bolat Baqaýov qatysty, dep habarlaıdy QazAqparat.
Oblys ákimi baspasóz qyzmetiniń málimetinshe, oqý ortalyǵynyń qurylysy 2009 jyly bastalǵan bolatyn. Alaıda, keshenniń jertólelerin jerasty sýy basyp qaldy. Keıin merdigerge qatysty problema boldy. Osynyń saldarynan qurylys toqtady. Tek, sońǵy birneshe jyldyń ishinde ǵana jumys alǵa basa bastady. Ortalyqtyń qurylysyn jandandyrý úshin oblystyq bıýdjetten 4 mlrd teńgege jýyq qarjy bólindi. Endi, mine keshen qurylysy da aıaqtaldy.
«Úkimettiń qoldaýynyń nátıjesinde ortalyq qurylysyn oıdaǵydaı aıaqtadyq. Búginde bizdiń óńirde kadr tapshylyǵy bar jáne bul tek otyn-energetıka keshenine ǵana qatysty emes. Bolashaqta bul jerden bilikti mamandar men basshylar tárbıelenip shyǵady degen senimdemiz», – dedi Pavlodar oblysynyń ákimi Bolat Baqaýov ashylý rásiminde
Otyn-energetıka keshenine kadr daıarlaıtyn óńiraralyq ortalyq 13 korpýstan turady. Munda 480 oryndyq jataqhana, 100 oryndyq qonaq úı, ashana, sport zal, akt zaly bar. Ortalyqtaǵy oqý protsesi tehnıkalyq aǵylshyn tilinde de júrgiziletin bolady. 200 jańa jumys orny ashylady.
«Oqý ortalyǵynyń mártebesi tıisti lıtsenzııany alǵannan keıin aıqyndalatyn bolady. Qazir osy baǵytta jumys júrgizip jatyrmyz. Sondaı-aq oqý ortalyǵyna oqytýshylar quramyn tańdaý boıynsha da jumystar júrgizilýde», - dedi oblystyq bilim berý basqarmasy basshysynyń mindetin atqarýshy Jomart Qarambaev.
Oqý ortalyǵy jańa jyldan bastap jumysyn bastaıdy.
