Ekibastuzda órtte kúıik shalǵan er adam jansaqtaý bólimine jetkizildi
PAVLODAR. QazAqparat - Ekibastuz qalasynyń Shiderti kentinde Áýezov kóshesi boıyndaǵy kópqabatty turǵyn úıde bolǵan órtten 1977 jylǵy er adam zardap shekti.
Bul týraly oblystyq TJD baspasóz qyzmetiniń mamany Gaýhar Syzdyqova málim etti, dep habarlaıdy pavlodarnews.kz.
«1 qańtar kúni bir bólmeli páter tolyǵymen janyp ketken. Tilsiz jaý 40 sharshy metr aýmaqty sharpyǵan. Órtti sóndirý kezinde ysty gazdan ýlanǵan er adam Ekibastuz qalalyq aýrýhanasynyń jansaqtaý bólimine jetkizildi. Oǵan «birinshi jáne ekinshi dárejede aıaqtarynyń kúıýi» dıagnozy qoıyldy», - deıdi Gaýhar Syzdyqova.
Órt bolǵan turǵyn úıden ózdiginen 10 adam syrtqa shyqqan. Onyń altaýy - bala. Qazirgi tańda órttiń shyǵý sebebi men keltirilgen shyǵyn kólemi anyqtalýda.
