Ekibastuzda kóshede er adamdy atyp óltirgen kúdikti ustaldy
EKІBASTUZ. QazAqparat - Ekibastuzda adam ólimine qatysty kúdikti ustalyp, qylmys qarýy tárkilendi, dep habarlaıdy QazAqparat Pavlodarnews.kz saıtyna silteme jasap.
Pavlodar oblystyq Polıtsııa departamenti baspasóz qyzmetiniń málimeti boıynsha, 23 aqpan kúni saǵat 08:00-de Sátbaev kóshesindegi úıdiń aýlasynda belgisiz adam ózge er adamǵa oq atyp, ol oqıǵa ornynda kóz jumǵan.
Atalǵan fakti boıynsha QR QK 99-baby 1-bóligine sáıkes sotqa deıingi tergeý bastaldy.
«Jedel-izdestirý is-sharalarynyń nátıjesinde polıtsııa qyzmetkerleri osy qylmysty jasady degen kúdikpen 65 jastaǵy er adamdy ustady.
Oqıǵanyń mán-jaıy men sebepteri anyqtalýda. Kúdikti Ekibastuz qalasynyń ýaqytsha ustaý ızolıatoryna qamaldy. Qarý-jaraq tárkilendi. Qazaqstan Respýblıkasy QPK-niń 201-babyna sáıkes ózge aqparat tergeý múddesine oraı jarııalanbaıdy», - dep habarlady PD bastyǵy Nurlan Másimov.
Eske sala keteıik, keshe Ekibastuzda qala turǵyndarynyń kózinshe er adamdy atyp ketken bolatyn. Qylmys barysy kóshedegi beınebaqylaý kameralaryna túsip qalǵan.
