Ekibastuzda koronavırýs juqtyrǵan jańa bosanǵan áıel aýyr halde jatyr
EKІBASTUZ. QazAqparat - Pavlodar oblysynda koronavırýs ınfektsııasynyń aýrý belgilerimen 2 adam tirkeldi, dep habarlaıdy QazAqparat COVID-19 taralýyna jol bermeý jónindegi vedomstvoaralyq komıssııaǵa silteme jasap.
COVID-19 1977 jylǵy áıel adamda jáne 1958 jylǵy er adamda anyqtaldy. Ekeýi de - Ekibastuz qalasynyń turǵyndary.
43 jastaǵy áıel adam júktiliktiń 40 aptasynda Pavlodar qalasynyń juqpaly aýrýlar akýsherlik-hırýrgııalyq gospıtaline júgingen. Onyń ishiniń tómengi jaǵy aýyryp, murny bitelgen. Dene qyzýy 38 gradýsqa deıin kóterilip, jótelgen.
Tekseris ókpeniń ekijaqty qabynýyn anyqtady. COVID-19-ǵa alynǵan analız bul azamatshanyń vırýsty juqtyrǵanyn kórsetti. Sol kúni azamatsha kesar otasymen tıisti merziminde balany dúnıege ákeldi. Qazirgi kezde patsıenttiń jaǵdaıy ıntoksıkatsııa, demikpeniń artý esebinen aýyr bolyp otyr. Náreste taldaý nátıjesi kelgenge deıin baqylaýda bolady.
62 jastaǵy er adam jumys orny boıynsha buǵan deıin anyqtalǵan KVI jaǵdaıymen baılanysta bolǵandyqtan tekserilgen. Emhanaǵa dene qyzýynyń kóterilýi, bas aýrýyna, býyndarynyń aýyrýyna shaǵynyp júgingen. PTR-zertteý COVID-19-dy anyqtady.
Patsıent Sultanov atyndaǵy oblystyq aýrýhananyń juqpaly aýrýlar statsıonaryna jatqyzyldy.
Olarmen baılanysta bolýy múmkin adamdar anyqtaldy.
USO fılıaly mamandarynyń kúshimen oshaqtarda dezınfektsııa júrgizildi. Óńirde epıdemııaǵa qarsy sharalar qolǵa alynǵan.
9 maýsymdaǵy jaǵdaı boıynsha Pavlodar oblysynda koronavırýs ınfektsııasymen jalpy 286 adam tirkelgen, onyń ishinde 172-si jazylyp shyqqan.
