Ekibastuzda kólik jylqyny qaǵyp, 5 adam zardap shekti
Zardap shekken 20 jastaǵy júkti áıeldiń jaǵdaıy qanaǵattanarlyq, júktilikti toqtatý qaýpi joq, oǵan ambýlatorııalyq em usynylǵan.
Kóliktiń jylqyny soqqany týraly aqparat áleýmettik jelidegi pablıkterdiń birinde paıda boldy.
Oblystyq densaýlyq saqtaý basqarmasynyń aqparaty boıynsha, jol apaty Ekibastuz - Solnechnyı kenti avtojolynda bolǵan.
Oqıǵa saldarynan bes adam zardap shekken, onyń tórteýi Ekibastuz qalalyq aýrýhanasyna jetkizildi.
«Taǵy bir 20 jastaǵy áıeldiń mıy shaıqalyp, mı jabyq jaraqatyn alǵany anyqtaldy. Sondaı-aq ol tizesinen jaraqat alǵan. Densaýlyq jaǵdaıy ortasha, aýrýhanaǵa jatqyzýdan bas tartty», - deıdi basqarma ókilderi.
Budan basqa, 19 jastaǵy jigitke bet súıekteriniń jaraqaty dıagnozy qoıyldy, reanımatsııada jatyr, jaǵdaıy aýyr, biraq turaqty.
34 jastaǵy er adam jabyq bas súıek-mı jaraqatyn alǵan, mıy shaıqalǵan, mańdaıynyń oń jaq tusy soǵylǵan, sol jáne oń jaq bilektiń jumsaq tinderi jaraqattanǵan, eki qoly soǵylǵan. Travmotologııalyq bólimge ornalastyryldy, jaǵdaıy ortasha aýyr.
37 jastaǵy er adam tekserýden bas tartty.
Jol apaty 23 shilde kúni saǵat 23.00 shamasynda bolǵan.
Oblystyq polıtsııa departamenti baspasóz qyzmetiniń málimetinshe, «Aýdı 80» markaly avtomobıldi basqaryp kele jatqan 34 jastaǵy júrgizýshi «Ekibastuz-GRES 2» avtojolynda jylqyny soqqan.
«Sonyń saldarynan júrgizýshi men onyń úsh jolaýshysy Ekibastuz qalasynyń aýrýhanasyna medıtsınalyq kómekke júgingen. Jylqynyń ıesi anyqtaldy, oǵan qatysty QR ÁQBtK-niń 408-baby 2-bóligi boıynsha ákimshilik is qozǵaldy, - deıdi departament ókilderi.