Ekibastuzda karantın kezinde toı jasaǵandar jaýapqa tartyldy
PAVLODAR. QazAqparat – Qala polıtseıleri keıingi kúnderi karantın tártibin buzý týraly jınalǵan materıaldardy Qalalyq taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberdi, dep habarlaıdy QazAqparat tilshisi.
«Baqylaý toby altynshy qarashada, saǵat 17:45-ter shamasynda Ekibastuz qalasy Abaı kóshesindegi «Báıterek» meıramhanasynyń banket zalynda otbasylyq toı bolyp jatqanyn anyqtady. Toıǵa 60-tan astam adam qonaq bolǵan. Qonaqtardyń bárin mekemeden shyǵaryp, meıramhana dırektoryna QR ÁQBtK 425-baby birinshi bóligi boıynsha ákimshilik hattama toltyryldy», - dep habarlady tilshilerge Pavlodar oblystyq Polıtsııa departamentiniń baspasóz qyzmeti.
Mekeme tartqan málimetterge qaraǵanda, aımaqta karantın erejesin saqtaýdy baqylaý sharalary jalǵasyp jatyr. Negizgi mindet – koronavırýs ınfektsııasynyń taralýyn boldyrmaý jáne azaıtý úshin sanıtarııalyq-epıdemııalogııalyq talaptardyń oryndalýyn qadaǵalaý.
«Jetinshi qarashada Júsip kóshesindegi «Pıramısa» saýda úıinde «Planeta odejdy» bóliminiń jumys istep jatqany belgili boldy. Tyıym salynǵanyna qaramastan, satýshylar demalys kúnderi jumysqa shyqqan», - dep tolyqtyrdy departamenttegiler.
Jınalǵan materıaldar sheshim qabyldaý úshin Ekibastuz qalasynyń Taýarlar men kórsetiletin qyzmetterdiń sapasy men qaýipsizdigin baqylaý basqarmasyna jiberildi.
«Azamattardyń densaýlyǵy óte mańyzdy. Karantın tártibin saqtamaıtyn adamdar jaýapqa tartylady, sebebi olar ózine ǵana emes, aınalasyna da qaýip tóndiredi», - dep málimdedi Pavlodar oblystyq polıtsııa departamenti basshysynyń birinshi orynbasary Jasqaırat Qaıyrov.
Anton Gagarın