Ekibastuzda ınternette 12 jigitpen tanysyp, aqshasyn bermeı ketken alaıaq áıel sottaldy
EKІBASTUZ. QazAqparat - Pavlodar oblysynyń Ekibastuz qalasynda 31 jastaǵy áıel sottaldy, dep habarlaıdy QazAqparat.
Oblystyq polıtsııa departamentiniń baspasóz qyzmeti atap ótkendeı, Ekibastuz polıtsııasyna belgisiz áıeldiń alaıaqtyq áreketi boıynsha birneshe aryz túsken.
Aryzdanǵandardyń bári uqsas shema boıynsha aldanǵan. Sondyqtan materıaldardy zerdeleý kezinde polıtseıler muny jasaǵan bir adam degen qorytyndyǵa keldi.
Kóp uzamaı polıtsııa qyzmetkerleri 31 jastaǵy qala turǵynyn ustady.
«Tergeý onyń 12 faktige qatysy bar ekenin dáleldedi. Alaıaqtyq faktileri boıynsha tergeý bólimshesi is júrgizdi, sodan keıin ol sotqa jiberildi. Bul áreketi úshin Ekibastuz turǵyny 4 jylǵa bas bostandyǵynan aıyryldy», - deıdi Pavlodar oblystyq polıtsııa departamenti bastyǵynyń orynbasary Rashad Óteýov.
Áıel basqa ádemi qyzdyń fotosýretin qoıyp, áleýmettik jelilerdiń birinde akkaýnt ashqan. Keıin 27 jastaǵy er adammen kezdesken.
Ol telefon men hat almasý arqyly ózin isker qyz retinde kórsetken.
Bir kúni «bıznes ledı» týyndaǵan problemalary týraly aıtyp, jańa tanysynan qaryzǵa aqsha suraıdy. Ony jaqyn arada qaıtarýǵa ýáde bergen.
Er adammen kezdesýge ol óziniń esepshisin jibergen, biraq is júzinde ózi barǵan. Er adam «býhgalterge» bıznesti damytýǵa qajetti 1 mln 300 myń teńge kóleminde qarajat bergen.
Bir aıdan keıin er adam alaıaqtyń qarmaǵyna túsip, polıtsııaǵa júgindi.
«Internettegi kezdesýlerge muqııat bolyńyz. Alaıaqtardyń aıla-amaldaryna kónbeńiz» dep eskertedi polıtsııa.
Aıta ketý kerek, jyldyń basynan beri Pavlodar oblysynyń aýmaǵynda 899 alaıaqtyq faktisi tirkelgen, onyń 582-si aqparattyq tehnologııalar arqyly jasalǵan.
