Ekibastuzda halyqty tonaǵan «polıtseı» sottaldy
ASTANA. QazAqparat - Ekibastuz qalalyq sotynda 32 jastaǵy alaıaqtyń isi qaraldy. Ol urlyqpen aınalysyp qana qoımaı, ózin polıtseı retinde tanystyryp, halyqty tonaǵan, dep habarlaıdy QazAqparat tilshisi.
Sot materıaldaryna sáıkes, B. esimdi azamat ortalyq bazarda isteıtin bir satýshy áıeldiń sómkesin urlap, ishinde bolǵan 40 myń teńgeni qoldy qylǵan. Onymen qoımaı, 2017 jyly tamyz aıynda 10 myń teńgelik sývenırlik kýpıýralarmen esep aıyrysyp, alaıaqtyq jasady. Ol aqshaǵa taýar alyp, taksı qyzmetin de tólegen. Qaıtarymǵa 7-8 myń teńgeni shyn aqshamen alyp otyrdy. Al qazan aıynda ol ózin polıtsııa qyzmetkeri retinde tanystyryp, O. esimdi áıeldiń sómkesin teksergen. Sóıtip, ony da aldap, aqshasyn urlap ketken.
«Ekibastuz qalalyq sotynyń úkimimen buǵan deıin sottalǵan 32 jastaǵy B. esimdi azamat Qylmystyq kodekstiń 188-baby men 190-baby boıynsha kináli dep tanylyp, eki jylǵa bas bostandyǵynan aıyryldy. Budan bólek, aryz berýshilerdiń materıaldyq shyǵyndaryn óteý maqsatynda sottalýshydan barlyǵy 47 800 teńge óndirildi. Sot úkimi kúshine endi», - delingen qalalyq sottyń resmı habarlamasynda.
