Ekibastuzda eki qabatty úıdiń shatyry janyp ketti, órt sóndirildi

PAVLODAR. QazAqparat – Pavlodar oblysynyń Ekibastuz qalasynda kóppáterli úıden shyqqan órt sóndirildi. Ottyń shyǵý sebebi men shyǵyny anyqtalyp jatyr, dep habarlaıdy QazAqparat Pavlodarnews.kz saıtyna silteme jasap.

Buǵan deıin habarlaǵanymyzdaı, búgin Ekibastuz qalasynda saǵat 17:57-de 2-MÓSB baılanys pýltine M.Júsip kóshesi, 2 mekenjaıynda ornalasqan eki qabatty turǵyn úıdiń shatyry janyp jatqany týraly shaqyrtý tústi. Adamdar dereý qaýipsiz jerge shyǵaryla bastady.

«Shaqyrtý boıynsha 7 tehnıka men jeke quramnan 40 adam jiberildi. Oqıǵa ornyna jetkende 800 sharshy metr aýmaqta – shatyr jáne 8 sharshy metr aýmaqta 2 balkon janyp jatty. Sebebi anyqtalýda», - delingen Pavlodar oblysy Tótenshe jaǵdaılar departamentiniń baspasóz qyzmeti usynǵan málimette.

Tilsiz jaýdan zardap shekkender joq. Eki qabatty úıden 30 adam evakýatsııalandy. Onyń ishinde jeteýi – balalar.

Sondaı-aq úıden 15 gaz ballony shyǵaryldy. Onyń on biri 27 lıtrlik bolsa, tórteýi – 50 jáne bireýi 5 lıtrlik ballondar.

Órttiń taralýy saǵat 18:43-te oqshaýlandyrylyp, 19:41-de tolyǵymen óshirildi.