Ekibastuzda dala órtinen 73 qoı-eshki janyp ketti

PAVLODAR. QazAqparat – Ekibastuz irgesindegi dala órtinen Álkeı Marǵulan aýylynda 73 bas usaq mal shyǵyny boldy. Bul týraly Pavlodar oblysynyń ákimi Asaıyn Baıhanov óziniń áleýmettik jelidegi resmı paraqshasynda jazdy, dep habarlaıdy QazAqparat tilshisi.

«Keshe dala órtteri oryn alǵan Baıanaýyl, Maı aýdandary jáne Ekibastuzdyń aýyldyq aımaqtaryna bardym. Sharýa qojalyqtarynyń basshylarymen kezdesip, máselelerdiń sheshý joldaryn birlesip talqyladyq», - dep jazady oblys ákimi Asaıyn Baıhanov óziniń Іnstagram paraqshasynda.

Ákimniń málimetine saı, sharýalarǵa 4 baǵytta kómek kórsetiledi:

- shabyndyq úshin arzandatylǵan dızel otynynyń kólemi 4 myń tonnadan 10 myń tonnaǵa deıin artady

- jemshóp daıyndaý úshin sýbsıdııa kólemi bir bas ІQM úshin 7 myńnan 15 myń teńgege deıin jáne usaq mal úshin 3 myńnan 5 myń teńgege deıin artady

- muqtaj fermerlerge qor sanaty, memlekettik orman qory jáne jaıylma ýchaskelerinde shóp daıyndaýǵa múmkindik beremiz;

- dándi daqyl jınaý kezinde saban daıyndaýdy qarastyratyn bolamyz, jınaýǵa múmkindik bolatyndaı, saban usaqtalmaı egistikterde qaldyrylady.

«Sondaı-aq, órt saldarynan 73 bas usaq mal (50 eshki jáne 23 qoı) janyp ketken Álkeı Marǵulan aýylynyń turǵyndaryna keltirilgen shyǵyndy óteý úshin óńirdiń iri kásiporyndarymen materıaldyq qoldaý kórsetiletin bolady. Sonymen qatar, jazǵy úıi men malǵa arnalǵan qorshaýy zardap shekken eki sharýashylyqqa da dál osyndaı kómek kórsetiledi», - dep málim etti Asaıyn Baıhanov.

Eske salaıyq, 13 shildede Ekibastuzdaǵy dala órtinen sharýa qojalyǵynyń usaq maldary tirideı janyp, keıbirin kúıik shalǵanyn jazyp edik.